Read Zarma Psalms 118 Bible Online

Psalms 118 - Zarma bible

Psalms 118

¹Wa saabu Rabbi se, zama nga wo booriyankoy no. Zama a baakasinay suujo ga tondo hal abada.

²Israyla ma ne: «A baakasinay suujo ga tondo hal abada.»

³Haruna kunda ma ne: «A baakasinay suujo ga tondo hal abada.»

⁴Borey kaŋ yaŋ ga humburu Rabbi ma ne: «A baakasinay suujo ga tondo hal abada.»

⁵Ay taabo ra ay na Rabbi ce. Rabbi tu ay se k'ay jisi nangu yulwante ra.

⁶Rabbi go ay do haray, ay si humburu. Ifo no Adam-ize ga hin ka te ay se?

⁷Rabbi go ay do haray, A go borey kaŋ yaŋ g'ay gaakasinay ra. Woodin se no ay ga di ay muraadey feeri ay konnakoy boŋ.

⁸Ni ma koru Rabbi do bisa ni ma naanay boro gaa.

⁹Ni ma koru Rabbi do bisa ni ma naanay bonkooney gaa.

¹⁰Ndunnya dumey kulu n'ay windi. Daahir no Rabbi maa ra no ay g'i pati-pati.

¹¹I n'ay windi, oho, i n'ay windi. Daahir no Rabbi maa ra no ay g'i pati-pati.

¹²I n'ay windi sanda yu beeri hamni cine, I danjo ga tara ka bu sanda karji gaa danji. Daahir Rabbi maa ra no ay g'i pati-pati.

¹³Araŋ n'ay kar da gaabi hal ay ma kaŋ, Amma Rabbi n'ay gaa.

¹⁴Rabbi no ga ti ay gaabo d'ay bayto. Nga mo no ka ciya ay faaba.

¹⁵Farhã da faaba jinde go adilantey bukkey ra. Rabbi kambe ŋwaari ga yaarutaray te.

¹⁶Rabbi kambe ŋwaari ga beeri. Rabbi kambe ŋwaaro ga yaarutaray te.

¹⁷Ay si bu bo. Fundi n'ay ga te ka Rabbi goyey dede.

¹⁸Rabbi n'ay gooji nda dungay, Amma a man'ay nooyandi buuyaŋ se.

¹⁹Ma adilitaray windi meyey fiti ay se. Ay ga furo i do, ay ga saabu Rabbi se mo.

²⁰Woone no ga ti Rabbi windi meyo, Adilantey no ga furo a gaa.

²¹Ay ga saabu ni se, zama ni tu ay se, Ni ciya ay faaba mo.

²²Tondo kaŋ cinakoy wangu, Nga no ciya cinaro boŋo.

²³Woodin ya Rabbi te-goy no, Dambara hari mo no iri diyaŋ gaa.

²⁴Zaaro neeya kaŋ Rabbi te. Iri ma farhã, iri ma te bine kaani a ra.

²⁵Ya Rabbi, ay goono ga ni ŋwaaray no, ma faaba! Ya Rabbi, ay goono ga ni ŋwaaray no, Ma albarka daŋ!

²⁶Albarkante no nga kaŋ goono ga kaa Rabbi maa ra, Rabbi fuwo ra no iri na albarka gaara araŋ se.

²⁷Rabbi no ga ti Irikoy, a na iri no annura mo. Wa sarga haw feema hilley gaa da korfoyaŋ.

²⁸Nin no ga ti ay Irikoyo, ay ga saabu ni se mo. Nin no ga ti ay Irikoyo, ay ga ni beerandi.

²⁹Wa saabu Rabbi se, zama nga wo booriyankoy no, Zama a baakasinay suujo ga tondo hal abada.