Read Zarma Psalms 132 Bible Online

Psalms 132 - Zarma bible

Psalms 132

¹Zijiyaŋ dooni no. Ya Rabbi, ma fongu Dawda gaa a kankamey kulu sabbay se.

²Zeyaŋo kaŋ a te Rabbi se, Da sarto kaŋ a sambu Yakuba wane Hinkoyo se, ka ne:

³«Daahir, ay si furo ay windo ra, Ay si kaaru mo ay daarijo boŋ,

⁴Ay s'ay moy no jirbi, ay si dusungu mo,

⁵Kala day d'ay du Rabbi se nangu jina, Kaŋ ga ti Yakuba wane Hinkoyo se nangoray.»

⁶A go, iri maa a baaru Efrata ra, Iri n'a gar Yaar farey ra.

⁷Iri ma furo a nangora ra, Iri ma sududuyaŋ te a ce taamey furkanga do.

⁸Ya Rabbi, ma tun ka koy ni fulanzamyaŋ nango do, Nin da ni hino sundurko.

⁹Ni alfagey ma daabu nda adilitaray, Ni wane hanantey mo ma doon farhã sabbay se.

¹⁰Ma si ni moyduma bare ka kaa ni wane suubananta gaa ni tamo Dawda sabbay se.

¹¹Rabbi ze Dawda se da cimi, A si bare ka fay d'a mo. A ne: «Ni ize gundey ra no ay ga afo dake ni karga boŋ.

¹²Da ni izey n'ay sappa d'ay seeda kaŋ ay g'i dondonandi nd'a haggoy, Kal i banda mo ma goro ni karga boŋ hal abada.»

¹³Zama Rabbi na Sihiyona suuban, A yalla-yalla nd'a ma ciya nga se nangoray.

¹⁴A ne: «Woone ya ay fulanzamyaŋ do no hal abada. Noodin no ay ga goro, zama ay yalla-yalla nd'a.»

¹⁵Ay g'a ŋwaaro albarkandi nda yulwa, Ay g'a laamikoyey kungandi nda ŋwaari.

¹⁶A alfagey mo, ay g'i daabu nda faaba, A wane hanantey mo ga doon farhã sabbay se.

¹⁷Noodin no ay ga naŋ Dawda hillo ma zay, Ay jin ka fitilla soola ay suubananta se.

¹⁸Ay g'a ibarey daabu nda haawi, Amma a koytaray fuula ga nyaale ay suubananta boŋ.