Read Zarma Psalms 135 Bible Online

Psalms 135 - Zarma bible

Psalms 135

¹Alleluya! Ya araŋ, Rabbi tamey, wa Rabbi maa sifa, W'a sifawo te!

²Araŋ kaŋ ga kay Rabbi fuwo ra, Iri Irikoyo fuwo windo ra,

³Wa Rabbi sifa, zama Rabbi ya booriyankoy no. Wa sifayaŋ baytu te a maa se, zama woodin ga kaan.

⁴Zama Rabbi na Yakuba suuban nga boŋ se, Israyla ya a mayray hari no.

⁵Zama ay bay kaŋ Rabbi ya beeraykoy no, Iri Irikoyo go de-koyey kulu boŋ.

⁶Hay kulu kaŋ ga kaan Rabbi se, woodin no a ga te, Beene nda ganda ra, teekoy da guusuyaŋey ra.

⁷A ga naŋ burey ma tun za ndunnya me, A ga nyalawyaŋey daŋ beene hari sabbay se, A ga haw kaa taray a ma fun nga arzaka jisiri nangey ra.

⁸Nga no ka Misira laabo hay-jiney kar, Boro gaa, alman gaa.

⁹Ya Misira, a na alaama nda dambara goy yaŋ te ni bindo ra, Firawna* nda nga bannyey kulu boŋ.

¹⁰A na ndunnya dumi boobo kar, A na bonkooni hinkoyey mo wi:

¹¹Amorancey bonkoono Sihon, da Basan bonkoono Og, Da Kanaana mayrayey kulu.

¹²A na i laabo nooyandi tubu hari, Tubu hari no nga borey Israyla se.

¹³Ya Rabbi, ni maa ga tondo. Ya Rabbi, ni fonguyaŋo mo go no zamana ka koy zamana.

¹⁴Zama Rabbi ga nga jama ciiti, A ga bakar mo nga tamey se.

¹⁵Dumi cindey toorey ya wura nda nzarfu yaŋ no, Borey kambe goyyaŋ no.

¹⁶I gonda me, amma i si salaŋ; I gonda mo, amma i si di;

¹⁷I gonda hanga, amma i si maa, Fulanzamay mo si no i meyey ra.

¹⁸Borey kaŋ g'i te ga ciya i cine yaŋ, Oho, hala nda boro kulu kaŋ ga de i gaa.

¹⁹Ya Israyla dumo, wa Rabbi sifa! Ya Haruna kunda, wa Rabbi sifa!

²⁰Ya Lawi kunda, wa Rabbi sifa! Araŋ kaŋ ga humburu Rabbi, wa Rabbi sifa!

²¹Rabbi kaŋ goono ga goro Urusalima ra, A sifayaŋo ma fun Sihiyona ra. Alleluya!