Read Zarma Psalms 139 Bible Online

Psalms 139 - Zarma bible

Psalms 139

¹Doonkoy jine bora se. Dawda baytu fo no. Ya Rabbi, ni n'ay fintal, ni n'ay bay mo.

²Ay goray d'ay tunyaŋ kulu, ni g'i bay. Ni n'ay fonguyaŋey bay za nangu mooro.

³Ni n'ay fonda d'ay kaniyaŋo kulu fintal, Ni n'ay muraadey kulu bay.

⁴Zama za sanni kulu si no ay deena boŋ, Nin, ya Rabbi, ni n'a kulu bay.

⁵Ni n'ay kali jina nda banda, Ni na ni kambe dake ay boŋ.

⁶Bayray woodin, a dambara bisa ay gaabi. A ga ku, ay si hin ka to a gaa.

⁷Man no ay ga koy ka fay da ni Biya, Wala man no ay ga zuru ni se ka koy?

⁸D'ay kaaru ka koy hala beena ra, ni go noodin. D'ay n'ay daarijo daaru Alaahara, noodin mo ni go no.

⁹D'ay na mo boyaŋ fata sambu hala ay ma koy ka goro teeko ya-haray meyo gaa,

¹⁰Hala noodin bumbo ni kambe g'ay candi, Ni kambe ŋwaari g'ay gaay.

¹¹D'ay ne: «Daahir kubay no g'ay daabu, Hananyaŋo kaŋ go ay windanta mo ga ciya cin.»

¹²Kubay bumbo manti kubay no ni se, Cin mo ga kaari sanda zaari cine. Kubay da kaari, i kulu afolloŋ no ni se.

¹³Zama ay taka kulu, nin no k'a te. Ni n'ay dabu-dabu za ay nyaŋo gunde ra.

¹⁴Ay ga saabu ni se, Zama ay teeyaŋo ya humburkumay hari no, Haŋ kaŋ ga dambarandi mo no. Ni goyey ga dambarandi, Woodin mo ay bina n'a bay gumo.

¹⁵Ay biriyey manti tugante no ni se, Waato kaŋ i n'ay te tuguyaŋ ra, Waato kaŋ i n'ay cina nda gonitaray ndunnya guusuyaŋey ra.

¹⁶Ni moy go ga di ay za ay go kuri gude. Jirbey kaŋ ni waadu ay se mo, ni n'i kabu, I n'i kulu hantum ni tira ra, Za waati kaŋ baa afo mana te jina.

¹⁷Ya Irikoy, man ni miiley darza misa ay se! Man i kabuyaŋo baayaŋ misa!

¹⁸D'ay g'i kabu, i baa da laabu gurey. Waati kaŋ ay mo hay, hala hõ day ay go ni banda.

¹⁹Ya Irikoy, doŋ day ni ma boro laaley wi! Ya araŋ borey kaŋ goono ga kuri mun, Wa gana ka fun ay gaa.

²⁰Zama i goono ga ni ciine te da laala, Ni ibarey mo goono ga ni maa ce yaamo.

²¹Ya Rabbi, manti ay konna ni konnakoy? Manti ay ga dukur da borey kaŋ yaŋ murte ni gaa?

²²Ay ga konn'ey da konnari toonante, I ciya ay ibareyaŋ.

²³Ya Irikoy, ni m'ay fintal k'ay bina bay. M'ay neesi, k'ay fonguyaŋey bay.

²⁴Ma guna ka di hala laala fondo fo go no ay do, Ma jine candi ay se mo hal abada fonda ra.