Read Zarma Psalms 145 Bible Online

Psalms 145 - Zarma bible

Psalms 145

¹Irikoy sifaw kaŋ Dawda te no. Ya ay Irikoyo, ay Koy Beero, ay ga ni beerandi! Ay ga ni maa sifa mo hal abada abadin.

²Zaari kulu no ay ga ni sifa, Ay ga ni maa sifa mo hal abada abadin.

³Rabbi wo beeraykoy no, a to i m'a sifa gumo. A beera bisa fintalyaŋ mo.

⁴Zamana fo boroyaŋ ga ni goyey sifa zamana fo boroyaŋ se, I ma ni goy hinkoyey dede.

⁵Ni darza beeray beero din, Da ni goyey kulu kaŋ ga dambarandi, Ay ga soobay k'i miila.

⁶Borey ga ni goy hinkoyey kaŋ ga humburandi sanni te, Ay mo, ya ni beera sifa.

⁷I ga ni gomno beera sanni ci, I ma farhã kuuwayaŋ te ni adilitara sabbay se.

⁸Rabbi ya gomni nda suuji koy no. A ga suuru hal a bine ga tun, A gonda baakasinay suuji boobo mo.

⁹Rabbi ya gomnikoy no boro kulu se, A suujey go a goyey kulu se.

¹⁰Ya Rabbi, ni goyey kulu ga ni kuuku, Ni wane hanantey mo ga ni sifa.

¹¹I ga ni mayray darza sanni te, I ma soobay ka ni hino sanni salaŋ,

¹²Zama i ma ni goy hinkoyey bayrandi Adam-izey se, Ngey da ni mayray beero darza.

¹³Ni mayra wo, mayray kaŋ ga duumi no, Ni koytara mo tabbatante no zamaney kulu ra.

¹⁴Rabbi ga ngey kaŋ yaŋ ga ba ka kaŋ kulu gaay, A ga gungumante kulu tunandi mo.

¹⁵Fundikooney kulu goono ga mo sinji ni gaa, Ni g'i no ngey ŋwaarey mo alwaati kaŋ ga hagu ra.

¹⁶Ni ga ni kambe feeri ka fundikooni kulu ibaayo toonandi a se.

¹⁷Rabbi ya adilitaraykoy no nga fondey kulu ra, Gomnikoy mo no a goyey kulu ra.

¹⁸Rabbi ga maan borey kulu kaŋ yaŋ ga nga ce gaa. Sanda borey kulu kaŋ yaŋ g'a ce da cimi.

¹⁹A ga borey kaŋ ga humbur'a muraadey feeri, A ga maa i hẽeno se mo k'i faaba.

²⁰Rabbi ga haggoy da nga baakoy kulu, Amma a ga boro laaley kulu halaci.

²¹Ay meyo ga Rabbi sifaw ci, Fundikooni kulu mo g'a maa hanna sifa hal abada abadin.