Read Zarma Psalms 147 Bible Online

Psalms 147 - Zarma bible

Psalms 147

¹Alleluya! Zama a boori i ma sifaw baytu te iri Irikoyo se, Zama haŋ kaŋ ga kaan no. Sifayaŋ mo, haŋ kaŋ ga hagu no.

²Rabbi ga Urusalima cina, A ga Israyla say-sayantey margu mo.

³A ga bine-saray-koyey yayandi, a g'i biyey haw.

⁴A ga handariyayzey baayaŋo kabu, A ga maa daŋ i kulu gaa.

⁵Iri Irikoyo ya Beeraykoy no, Gaabikooni mo no hin do. A fahama sinda me.

⁶Rabbi ga boŋ baanaykoyey gaay ka boro laaley zeeri hala ganda.

⁷Wa baytu Rabbi se da saabuyaŋ. Wa sifayaŋ baytu te iri Irikoyo se da moolo beeri.

⁸Nga no ga beene batama daabu nda buruyaŋ, A ma beene hari soola ndunnya se, A ma naŋ subu tayo ma fatta tondi kuukey boŋ.

⁹Nga no ga almaney no ngey ŋwaaro, Ngey da gaaru izey mo waati kaŋ i goono ga hẽ.

¹⁰A mana bari gaabo guna hala hay fo beeri no, A si maa boro cey kaani mo.

¹¹Rabbi ga maa kaani nda borey kaŋ yaŋ ga humburu nga, Kaŋ ga ti ngey kaŋ yaŋ ga beeje sinji a baakasinay suujo gaa.

¹²Ya Urusalima, ma Rabbi sifa! Ya Sihiyona, ma ni Irikoyo sifa!

¹³Zama a na ni birni meyey karangaley gaabandi, A na ni izey mo albarkandi ni ra.

¹⁴A ga laakal kanay daŋ hala ni hirrey me, A ga ni kungandi mo da alkama hamni baano.

¹⁵A ga nga lordo samba ndunnya boŋ, A sanno mo ga zuru nda waasi gumo.

¹⁶A ga neezu* no sanda feeji hamni kwaaray, A ga harandaŋ kaŋ ga ye sanda gari say-say sanda boosu cine.

¹⁷A ga nga gariyo catu zanjarmi-zanjarmi. May no ga hin ka kay a yeeno jine?

¹⁸A ga nga sanno samba k'i mannandi, A ga nga hawo daŋ a ma faaru, harey mo ga zuru.

¹⁹A ga nga sanno fe Yakuba se, A hin sanney d'a farilley mo Israyla se.

²⁰A mana yaadin cine te kunda fo se, A farilley mo, i si i bay. Alleluya!