Read Zarma Psalms 148 Bible Online

Psalms 148 - Zarma bible

Psalms 148

¹Alleluya! Wa Rabbi sifa za beena ra. W'a sifawo te nangu beerey ra.

²Ya araŋ, a malaykey kulu, w'a sifa! Ya araŋ, a kundey kulu, w'a sifaw te.

³Ya araŋ, wayna nda hando, w'a sifa! Ya araŋ, handariyayzey kulu kaŋ ga kaari, w'a sifa!

⁴Ya araŋ, beeney beeney, da araŋ mo, Harey kaŋ go beeney se beene, w'a sifa!

⁵I ma Rabbi maa sifa, zama nga no ka lordi te, Ngey mo taka.

⁶A n'i sinji mo hal abada abadin, A na hin sanni te mo kaŋ si gana.

⁷Ya araŋ, teeku ham beerey, da guusuyaŋey kulu mo, Wa Rabbi sifa za ne ndunnya ra.

⁸Danji nda gari, neezu* nda buuda, Da hirriyaŋ kaŋ gonda haw, i g'a sanno toonandi.

⁹Tondi kuukey, da tudey kulu, Da tuurey kaŋ izey ga ŋwa, da sedre* nyaŋey kulu,

¹⁰Da ganji hamey, da kwaara almaney kulu, Da wo kaŋ yaŋ ga fanag, da curo fatakoyey kulu,

¹¹Da ndunnya bonkooney, da dumey kulu, Da koy izey, da ndunnya alkaaley kulu,

¹²Da arwasey da wandiyey, da arkusu zeeney da zankey --

¹³I ma Rabbi maa sifa! Zama a maa hinne no ga ti beeraykoy, A darza mo go ndunnya da beena boŋ.

¹⁴A na nga borey hino beerandi mo, Nga hanantey kulu sifayaŋ nooya, Kaŋ ga ti Israyla izey, dumo kaŋ ga maan a. Alleluya!