Read Zarma Psalms 2 Bible Online

Psalms 2 - Zarma bible

Psalms 2

¹Ifo se no ndunnya dumey follo, Jamayaŋ mo ga hari yaamo yaŋ miila?

²Ndunnya bonkooney tun ka kay, Mayraykoyey mo goono ga me haw ka gaaba nda Rabbi nda nga Almasihu.

³I goono ga ne: «Iri m'i sisirey pati-pati, Iri m'i korfey feeri ka furu ka kaa iri gaa.»

⁴Beeney ra gorokwa ga haaru; Koy Beero ga dond'ey.

⁵Waato din gaa no a ga salaŋ i se nga futa ra, K'i taabandi nga dukuri konna ra, ka ne:

⁶«Kulu nda yaadin ay g'ay bonkoono sinji ay tondi hananta Sihiyona boŋ.

⁷Daahir ay ga Rabbi waado baaru fe. A ne ay se: ‹Ni ya ay izo no. Hunkuna no ay na ni hay.

⁸Ni m'ay hã, ay mo, Kala ay ma ni no ndunnya dumey ni tubu hari, Ndunnya nangu moorey me mo ma ciya ni mayray hari.

⁹Ni g'i ceeri-ceeri nda guuru-bi goobu. Ni g'i bagu-bagu sanda kusu cinako cambu cine.› »

¹⁰Yaadin gaa binde, ya araŋ, koyey, wa te laakal fa. Ya araŋ, ndunnya ciitikoy, wa gooji nda bayray.

¹¹Wa may Rabbi se da humburkumay, Wa farhã da jijiriyaŋ.

¹²Wa izo garba sunsum, zama a ma si futu hala mo araŋ ma halaci fonda boŋ, Zama a futay korna ga tara ka tun. Albarkante no borey kulu kaŋ yaŋ ga koru a do.