Read Zarma Psalms 25 Bible Online

Psalms 25 - Zarma bible

Psalms 25

¹Dawda wane no. Ya Rabbi, ni gaa no ay g'ay bina ye!

²Ya ay Irikoyo, ni gaa no ay ga de, Ma s'ay naŋ ya haaw. Ma si naŋ ay ibarey ma zaama te ay boŋ.

³Oho, boro kaŋ ga hangan ni se, a si haaw. Borey kaŋ yaŋ ga amaana ŋwa sabaabu kulu si, Ngey no ga haaw.

⁴Ya Rabbi, ma ni fondey cabe ay se, M'ay dondonandi nda ni fondey.

⁵M'ay candi ni cimo ra, m'ay dondonandi. Zama nin no ga ti Irikoy, ay faaba wano. Ni se no ay ga hangan zaari muudu.

⁶Ya Rabbi, ma fongu ni bakarawo da ni baakasinay suujey, Zama za doŋ-doŋ kaŋ sinda me i go no.

⁷Ma si fongu ay zankataray zunubey, wala ay taaley. Ya Rabbi, ma fongu ay gaa ni baakasinay suujo boŋ, Ni booriyaŋo sabbay se.

⁸Rabbi ya booriyankoy da adilitaraykoy no, Woodin se no a ga zunubikooney dondonandi fonda ra.

⁹A ga borey kaŋ yaŋ sinda boŋbeeray candi cimi ciiti ra. A ga ngey kaŋ yaŋ sinda boŋbeeray dondonandi nga fonda.

¹⁰Rabbi fondey kulu ya baakasinay suuji nda cimi no borey kaŋ yaŋ ga haggoy d'a alkawlo d'a seedey se.

¹¹Ya Rabbi, ni maa sabbay se m'ay zunubo yaafa, zama a ga beeri no.

¹²Boro woofo no ga humburu Rabbi? Rabbi no g'a koy dondonandi fondo kaŋ a ga hima ka suuban.

¹³A koy ga goro nda albarka, a banda mo ga laabo tubu.

¹⁴Rabbi gundo go borey kaŋ yaŋ ga humbur'a banda, A ga nga sappa cabe i se mo.

¹⁵Ay moy, waati kulu Rabbi do haray no i ga guna, Zama a g'ay cey soolam ka kaa hirrimi ra.

¹⁶Ma bare ay do, ma gomni goy te ay se mo, Zama ay go faaji nda taabi ra.

¹⁷Ay bina taabo tonton, ni m'ay kaa ay masiibey ra.

¹⁸Ma laakal ye ay kankamo d'ay taabey gaa, M'ay zunubey kulu yaafa mo.

¹⁹Ma laakal d'ay ibarey, zama i ga baa, I ga konna ay mo da konnari laalo.

²⁰M'ay fundo haggoy k'ay faaba, Hala ay ma si haaw, zama ni do no ay ga tugu.

²¹Naŋ cimi toonante da sabayaŋ m'ay hallasi, Zama ni se no ay ga hangan.

²²Ya Irikoy, ni ma Israyla fansa ka kaa nga taabey kulu ra.