Read Zarma Psalms 26 Bible Online

Psalms 26 - Zarma bible

Psalms 26

¹Dawda wane no. Ya Rabbi, m'ay no cimi, Zama ay hananyaŋo ra no ay dira. Ay de Rabbi gaa mo, fappeyaŋ si.

²Ya Rabbi, m'ay gosi, m'ay deedandi. M'ay gunda d'ay bina neesi.

³Zama ni baakasinay suujo go ay jine, Ni cimo ra no ay dira.

⁴In da boro yaamey mana margu ka goro care banda, In da munaficey mo mana dira care banda.

⁵Ay ga konna laala teekoy jama. Ay si yadda in da boro laaley ma goro care banda.

⁶Ya Rabbi, ay g'ay kambey nyun taali-jaŋay ra ka ni sargay feema windi,

⁷Zama ay ma saabuyaŋ jinde beeri tunandi, Ay ma ni dambara goyey kulu baaru fe.

⁸Ya Rabbi, ay ga ba ni windo ra goray, Da ni darza nangora mo.

⁹Ni ma s'ay biya sambu ka marga nda zunubikooney, Wala ay fundo mo boro-wiyey banda,

¹⁰Borey kaŋ yaŋ zamba muraadu go i kambey ra, I kambe ŋwaarey ga to no da me-daabu taayaŋ.

¹¹Amma ay wo, ay hananyaŋo ra no ay ga dira. M'ay fansa, ka gomni goy te ay se mo.

¹²Ay cey ga kay naŋ kaŋ go banda fo ra. Ay ga Rabbi kuku jama marga ra.