Read Zarma Psalms 30 Bible Online

Psalms 30 - Zarma bible

Psalms 30

¹Baytu. I m'a doon Rabbi fuwo hanandiyaŋo hane. Dawda wane no.

²Ya Rabbi, ay ga ni zamu, zama ni n'ay sambu beene, Ni mana naŋ ay ibarey ma farhã ay boŋ.

³Ya Rabbi ay Irikoyo, ay hẽ ni gaa, Ni n'ay no baani mo.

⁴Ya Rabbi, ni n'ay fundo kaa taray a ma fun Alaahara, Ni n'ay fundo yeti waato kaŋ ay gunguray ka koy guuso ra.

⁵Ya araŋ a ganakoy, wa baytu te Rabbi se, W'a saabu a hananyaŋo se.

⁶Zama a futa, sanda mo-ka-miyaŋ misa cine no, A gomno mo ga to fundi muudu. Hẽeni ga hanna cin folloŋ, Amma mo boyaŋ ga kande farhã zamuuyaŋ.

⁷Ay wo kay, ay laakal kanay gora ra ay ne: «I s'ay zinjandi hal abada.»

⁸Ya Rabbi, ni gomno boŋ ni naŋ ay tondi kuuko ma sinji nda gaabi. Ni na ni moyduma tugu, ay binde boŋ haw.

⁹Ya Rabbi, ay hẽ ni gaa, Ay Koyo gaa no ay ŋwaaray.

¹⁰Nafa fo ka bara ay kuro gaa d'ay gunguray ka do guuso ra? Laabu bulungo ga ni sifa no? Wala a ga ni cimo baaru fe no?

¹¹Ya Rabbi, ma maa, ma gomni goy te ay se! Ya Rabbi, ma ciya ay gaako!

¹²Ni n'ay bine sara bare ka ciya gaani, Ni n'ay seew bankaarayey feeri, Ni n'ay guddama da bine kaani.

¹³Zama ay bina ma sifayaŋ baytu te ni se, A ma si dangay mo. Ya Rabbi, ay Irikoyo, ay ga saabuyaŋ te ni se hal abada.