Read Zarma Psalms 33 Bible Online

Psalms 33 - Zarma bible

Psalms 33

¹Ya araŋ adilantey, wa cilili Rabbi se! Sifayaŋ ga hagu cimikoyey se.

²Wa Rabbi sifa nda moolo beeri, Wa sifayaŋ baytu te a se da moolo hamni-way-koy.

³Wa baytu taji te a se; Araŋ ma subo boriyandi da yooje beeri.

⁴Zama Rabbi sanno ya cimikoy no, A goyey kulu mo, naanay ra no a g'i te.

⁵A ga ba adilitaray da cimi ciiti. Ndunnya go toonante da Rabbi baakasinay suujo.

⁶Rabbi sanno no a na beeney te d'a. Beene kundey mo, a n'i te da nga meyo fulanzama.

⁷A ga teeku harey margu-margu ka gusam, A ga guusuyaŋey mo jisi nga jisiri nangey ra.

⁸Ndunnya kulu ma humburu Rabbi, Ndunnya gorokoy kulu ma di a gaakuro.

⁹Zama a salaŋ, haya kubay mo. A na lordi* te, sanno tabbat mo.

¹⁰Rabbi ga dumi cindey saawarey ciya yaamo, A ga borey dabarey ganji mo.

¹¹Rabbi saawara tabbat hal abada, A bina miiley mo hala zamaney kulu me.

¹²Albarkante no dumo kaŋ Rabbi no ga ti a Irikoyo, Borey kaŋ a suuban i ma ciya nga wane jama.

¹³Rabbi go beene, a goono ga guna. A ga di Adam-izey kulu.

¹⁴A nangora ra a ga ndunnya gorokoy kulu fonnay.

¹⁵Nga kaŋ na i biney kulu taka goono ga laakal daŋ i goyey kulu gaa.

¹⁶Bonkooni si no kaŋ ga faaba nga wongu marga baayaŋo sabbay se, Wongaari mo si yana nga gaabi beero sabbay se.

¹⁷Yana-ka-faaba ciina ra, bari ya hay fo yaamo no, A si boro kulu faaba mo nga gaabi beero sabbay se.

¹⁸A go, Rabbi moy go borey kaŋ yaŋ ga humbur'a gaa, Ngey kaŋ yaŋ ga beeje sinji a baakasina ra din gaa,

¹⁹Zama a m'i fundey faaba buuyaŋ gaa, A m'i haggoy mo haray jirbey ra.

²⁰Iri fundey goono ga hangan Rabbi se. Nga no ga ti iri gaakasina da iri korayo.

²¹Oho, iri biney ga farhã a do, Zama iri de a maa hanna gaa.

²²Ya Rabbi, ni baakasinay suujo ma goro iri boŋ, Hanganyaŋo kaŋ iri te ni se din boŋ.