Read Zarma Psalms 34 Bible Online

Psalms 34 - Zarma bible

Psalms 34

¹Dawda wane no waato kaŋ a na nga boŋ himandi follokom Abimelek jine, nga mo n'a gaaray, hal a dira.

²Ay ga Rabbi sifa alwaati kulu, A saabuyaŋo mo ga goro ay me ra duumi.

³Ay fundo ga fooma nda Rabbi. Boro kaŋ sinda boŋbeeray ga maa, a ga farhã mo.

⁴Wa Rabbi beerandi ay banda, Iri m'a maa beerandi gumo mo care banda.

⁵Ay na Rabbi ŋwaaray, a tu ay se mo. A n'ay soolam mo ka kaa ay humburkuma kulu ra.

⁶I guna a do haray, i kaari, I moydumey mo, haawi s'i di abada.

⁷Taabante woone hẽ, Rabbi maa a se mo, A n'a faaba k'a kaa nga taabey kulu ra.

⁸Rabbi malayka ga gata sinji borey kaŋ yaŋ ga humbur'a windanta, a g'i faaba mo.

⁹Wa taba ka maa kaŋ Rabbi ya gomnikoy no. Albarkante no boro kaŋ ga de a gaa.

¹⁰Ya araŋ a hanantey, wa humburu Rabbi. Zama jaŋay si no borey kaŋ yaŋ ga humbur'a se.

¹¹Muusu beeri izey ga jaŋ, i ga maa haray mo, Amma borey kaŋ yaŋ ga Rabbi ceeci si jaŋ hari hanno kulu.

¹²Ya araŋ zankey, wa kaa, wa hanga jeeri ay se, Ay g'araŋ dondonandi Rabbi humburkumay.

¹³May no boro kaŋ ga ba fundi, Kaŋ ga ba nga ma di jirbi hanney?

¹⁴To! Kal ni ma ni deena gaay laala ciyaŋ gaa, Ni meyo mo ma si gulinci salaŋ.

¹⁵Ma fay da goy laalo ka ihanno te, Ma laakal kanay ceeci k'a gana mo.

¹⁶Rabbi moy go adilantey gaa, A hangey mo go feerante i hẽeney se.

¹⁷Rabbi moyduma ga bare ka gaaba da goy laalo teekoy, Zama nga m'i fonguyaŋ tuusu ndunnya boŋ.

¹⁸Adilantey ga hẽ, Rabbi ga maa, A g'i soolam ka kaa i taabey kulu ra mo.

¹⁹Rabbi ga maan bine-saray-koyey, A ga borey kaŋ yaŋ gonda bine suugay faaba.

²⁰Adilante masiibey wo iboobo no, Day Rabbi g'a soolam ka kaa i kulu ra.

²¹A ga haggoy d'a biriyey kulu, I ra baa afolloŋ si ceeri.

²²Laala ga boro laaley wi, Borey kaŋ yaŋ ga konna adilantey mo, ciiti g'i zeeri.

²³Rabbi ga nga tamey fundey fansa. Borey kaŋ yaŋ ga de a gaa mo, Ciiti si baa afolloŋ zeeri i ra.