Read Zarma Psalms 36 Bible Online

Psalms 36 - Zarma bible

Psalms 36

¹Doonkoy jine bora se. Rabbi tamo Dawda wane no.

²Murteyaŋ go ga salaŋ boro laalo se a bina ra. Irikoy humburkumay si a jine.

³Zama a ga nga boŋ fafagu no nga boŋ diyaŋ ra, Ga miila nga laala si bangay ka ciya haŋ kaŋ i ga konna.

⁴A me sanno, laala da gulinci koonu no. A fay da laakal, a na ihanno teeyaŋ mo naŋ.

⁵A ga laala miila nga daarijo boŋ, A ga kay fondo kaŋ si boori boŋ, a si laala fanta mo.

⁶Ya Rabbi, ni baakasinay suujo go beeney ra, Ni naanayo mo to hala beeney gaa.

⁷Ni adilitara ga hima Irikoy tondi beerey, Ni ciitey guusuyaŋ, ibambata no. Ya Rabbi, nin no ga haggoy da boro nda alman kulu.

⁸Ya Irikoy, man ni baakasinay suujo darza misa? Adam-izey mo ga du koruyaŋ do ni fatey biyo ra.

⁹I ga haŋ ka yeesi mo da ni windo yulwa, Ni g'i haŋandi mo ni do fundi kaani maayaŋ isa gaa.

¹⁰Zama ni do no fundi hari zuro go. Ni kaaro ra no iri ga di hananyaŋ.

¹¹Ma naŋ ni baakasinay suujo ma soobay ka te borey kaŋ yaŋ ga ni bay se. Ni adilitara mo ngey kaŋ yaŋ gonda cimi ngey biney ra se.

¹²Ma si naŋ boŋbeeraykoy m'ay taamu, Ma si naŋ boro laaley kambe m'ay gaaray.

¹³Noodin no goy laalo teekoy kaŋ. I n'i naan, kal i si hin ka tun koyne.