Read Zarma Psalms 37 Bible Online

Psalms 37 - Zarma bible

Psalms 37

¹Dawda wane no. Ma si ni boŋ taabandi laalakoyey sabbay se. Ma si canse mo da borey kaŋ ga adilitaray-jaŋay te.

²Zama i g'i dumbu da waasi sanda subu cine. I ma lakaw mo sanda kobto tayo.

³Ma de Rabbi gaa, ma booriyaŋ goy te, Ma goro laabo ra, ma munye da naanay mo.

⁴Ni bina ma kaan Rabbi ra, Nga mo ga ni bina muraado feeri ni se.

⁵Ma ni fundo daŋ Rabbi kambe ra, Ma de a gaa, nga mo ga goy.

⁶A ga naŋ ni adilitara ma bangay sanda annura cine, Ni cimo mo sanda zaari bindi cine.

⁷Ma fulanzam hinne Rabbi ra, Ma hin suuru ka hangan a se. Ma si ni boŋ taabandi boro kaŋ goono ga te albarka nga fonda ra sabbay se, Nga kaŋ ga dabari laaloyaŋ kaa taray, I ga ŋwa mo.

⁸Ma fay da bine fortay, ma futay naŋ mo. Ma si ni boŋ taabandi, Woodin si kande hay kulu kala laala teeyaŋ.

⁹Zama Irikoy ga laala goykoyey halaci, Amma borey kaŋ yaŋ ga hangan Rabbi se, Ngey no ga laabo tubu.

¹⁰Zama d'a gay kayna, kulu laalakoy si no. Daahir, anniya no ni g'a nangora guna nd'a, A si ye ka bara noodin mo.

¹¹Amma borey kaŋ yaŋ sinda boŋbeeray ga laabo tubu, I ga ngey biney kaanandi mo baani yulwanta ra.

¹²Boro laalo ga me-hawyaŋ te adilante boŋ, A ga hinje kaama a se mo.

¹³Amma Koy Beero g'a haaru, Zama a di kaŋ a alwaato goono ga kaa.

¹⁴Laalakoyey na takuba foobu, i na haw daŋ biraw ra zama ngey ma taabante da laamikoy zeeri, Ngey ma fonda ra cimikoyey halaci.

¹⁵I takubey ga furo ngey bumbey biney ra, I birawey mo ga ceeri-ceeri.

¹⁶Dambe hari kayna kaŋ go adilante se, A ga bisa arzaka gusam kaŋ go laalakoy boobo se.

¹⁷Zama laalakoyey kambey ga ceeri-ceeri, Amma Rabbi ga adilante gaabandi.

¹⁸Rabbi ga cimi-toonante-koyey jirbey bay, I tubo mo tabbatante no hal abada.

¹⁹I si haaw masiiba jirbey ra bo, Haray jirbey ra mo i ga kungu.

²⁰Amma laalakoyey ga halaci, Rabbi ibarey mo ga ciya sanda kuray do darza. I ga say ka daray, i ga say sanda dullu cine.

²¹Laalakoy ga garaw sambu, a si bana mo, Amma adilante ya gomnikoy no, a ga nooyaŋ no.

²²Zama borey kaŋ yaŋ du albarka Irikoy do, Ngey no ga laabo tubu, Amma borey kaŋ yaŋ a laali, a g'i tuusu.

²³Rabbi ga boro ce taamuyaŋey tabbatandi, A ga farhã d'a fonda mo.

²⁴Baa a kaŋ, a si gay ganda bo, Zama Rabbi goono g'a gaay nga kambe ra.

²⁵Doŋ ay ya zanka no, sohõ mo ay zeen, Amma ay mana di i ma adilante furu baa ce fo, Wala mo a banda ma nga ŋwaaro ŋwaaray.

²⁶Zaari me-a-me a goono ga gomni goy te, A goono ga garaw daŋ, A bandey mo albarkanteyaŋ no.

²⁷Ma fay da laala, ma booriyaŋ te. Woodin gaa no ni ga goro hal abada.

²⁸Zama Rabbi ga ba cimi ciiti, A si nga hanantey furu mo. I g'i haggoy no hal abada, Amma a ga boro laalo ganji banda.

²⁹Adilantey ga laabo tubu, i ma goro a ra hal abada.

³⁰Adilante me ga laakal sanni salaŋ, A deena mo ga cimi ciiti sanni te.

³¹A Irikoyo asariya go a bina ra, A taamuyaŋey kulu si te tansi.

³²Boro laalo ga gum ka adilante batandi, A goono ga ceeci nga m'a wi.

³³Rabbi si adilanta naŋ a kambe ra. A s'a zeeri mo waati kaŋ i goono g'a ciiti.

³⁴Ma hangan Rabbi se, m'a fondey haggoy, Nga mo ga ni beerandi ni ma laabo tubu. Waati kaŋ a ga boro laaley tuusu, ni ga di a.

³⁵Ay doona ka di boro laalo kaŋ toonyante no. A go ga daaru ka yandi sanda tuuri tayo kaŋ go nga batama ra.

³⁶Amma a bisa, a si no mo. Oho, hala ay n'a ceeci zaati, Amma boro si ye ka di a koyne.

³⁷Ma laakal daŋ cimi-toonante-koy gaa, Ma adilante guna mo, Zama baani boro gonda kokora hanno.

³⁸Day zunubikooney ga halaci no care banda, Boro laaley kokora ga ti i m'i tuusu.

³⁹Amma adilantey faaba wo, Rabbi do no a ga fun. Nga no ga ti i gaabi do taabi alwaati ra.

⁴⁰Rabbi g'i gaakasinay, a g'i kaa kambe. Boro laaley kambe ra n'a g'i kaa, A g'i faaba mo zama i tugu a do.