Read Zarma Psalms 38 Bible Online

Psalms 38 - Zarma bible

Psalms 38

¹Dawda baytu fo kaŋ a te fongandiyaŋ se.

²Ya Rabbi, ma si deen'ay gaa ni futa ra, Ma s'ay gooji mo ni dukuri korna ra.

³Zama ni hangawey furo ay ra, Ni kamba mo goono g'ay naan da gaabi.

⁴Ay sinda baani ay hamo ra ni dukuro sabbay se, Gaabi mo si no ay biriyey ra ay zunubey sabbay se.

⁵Zama ay hartayaŋey ku d'ay boŋo, Sanda jaraw tiŋo cine, i bis'ay gaabi.

⁶Ay biyey te haw, i fumbu ay saamotara sabbay se.

⁷Ay gungum; ay sooli gumo, Zaaro me muudu ay goono ga dira nda bina sunnay.

⁸Zama ay gunde calbey to da tonyaŋ, Ay hamo kulu ra mo sinda baani.

⁹Ay dusu, ay tutubu-tutubu, Ay wurru bine ra laakal-kanay-jaŋay sabbay se.

¹⁰Ya Koy Beero, haŋ kaŋ ay ga laami kulu go ni jine, Ay durayyaŋo mo si tugante ni se.

¹¹Ay bina go ga fittaw, ay gaabo fay d'ay, Baa ay moy annura mo daray ay se.

¹²Ay baakoy d'ay corey kay nangu mooro, I goono ga di ay masiiba, Ay dumey mo go ga kay nangu mooro.

¹³Ay fundo ceecikoy mo na hirrimiyaŋ sinji ay se. Ngey mo kaŋ yaŋ ga ba ngey m'ay zamba goono ga halaciyaŋ ci, Zaari me-a-me i goono ga gulinci soola.

¹⁴Amma ay wo hima sanda lutu, yana maa. Ay ga hima beebe kaŋ si nga me fiti.

¹⁵Oho, ay ga hima sanda boro kaŋ si maa, Kaŋ kobay si no a me ra.

¹⁶Ya Rabbi, za kaŋ ni gaa no ay ga beeje sinji, Ya Koy Beero, ay Irikoyo, ni ga tu.

¹⁷Zama ay ne: «Waati kaŋ ay cey ga tansi, Kaŋ i ga boŋ jare ay se ka gaaba nd'ay, I ma si farhã ay boŋ.»

¹⁸Zama ay wo ga ba ka kaŋ, Ay bine sara mo go ay jine waati kulu.

¹⁹Zama ay g'ay taalo bangandi, Ay to da humburkumay ay zunubo sabbay se.

²⁰Amma ay ibarey ya iboobo no, i gonda hina mo. Borey kaŋ yaŋ wongu ay sabaabu kulu si, Ngey wo tonton gumo.

²¹Borey mo kaŋ ga laala bana ihanno se ya yanjekaariyaŋ no ay se, Zama haŋ kaŋ ga boori no ay goono ga gana.

²²Ya Rabbi, ma s'ay furu; ya ay Irikoyo, ma si mooru ay.

²³Ya ay Koyo, ya ay faaba, ma waasu k'ay gaa.