Read Zarma Psalms 44 Bible Online

Psalms 44 - Zarma bible

Psalms 44

¹Doonkoy jine bora se. Kora izey baytu fo no.

²Ya Irikoy, iri maa d'iri hangey, Iri kaayey mo ci iri se goy kaŋ ni te i jirbey ra, Za waato zamaney ra.

³Kaŋ ni na dumi cindey gaaray da ni kambe k'i sinji. Ni na kunda woodin yaŋ taabandi k'i say-say.

⁴Zama iri kaayey mana laabo ŋwa da ngey bumbey takuba bo, Manti mo i kambe jase no k'i faaba, Amma ni kambe ŋwaaro da ni jasa, Da ni moyduma annura no, zama ni yadda i gaa.

⁵Ya Irikoy, nin no ga ti ay Bonkoono, Ni ma faaba lordi Yakuba se.

⁶Ni do no iri ga du k'iri yanjekaarey tuti ka ye banda. Ni maa do mo no iri ga du ka borey kaŋ yaŋ ga gaaba nd'iri taamu-taamu.

⁷Zama ay si de ay birawo gaa bo, Ay takuba mo s'ay faaba.

⁸Amma nin no k'iri faaba iri yanjekaarey kambe ra, Ni n'iri konnakoy mo haawandi.

⁹Irikoy ra no iri ga fooma zaari me-a-me, Iri ga ni maa sifa mo hal abada. (Wa dangay)

¹⁰Amma sohõ ni n'iri furu, ni n'iri kaynandi mo, Ni siino ga fatta iri wongu margey banda.

¹¹Ni naŋ iri ma banda bare iri yanjekaarey se, Ngey kaŋ konna iri du wongu arzaka ngey boŋ se.

¹²Ni n'iri nooyandi sanda wiyaŋ feeji, Ni n'iri say-say dumi cindey ra.

¹³Ni goono ga ni borey neera faala, Ni mana du riiba fo mo i hayo gaa.

¹⁴Ni n'iri ciya jomboyaŋ hari iri gorokasiney se, Donda-caray da hahaarayaŋ hari mo iri windante waney se.

¹⁵Ni n'iri ciya deedandiyaŋ laalo hari kundey ra, Me nyatteyaŋ hari mo dumi cindey game ra.

¹⁶Waati kulu ay kaynayaŋo go ay jine, Ay moyduma haawo n'ay daabu, sip!

¹⁷Wowko jinde sabbay se kaŋ goono ga sanni ziibo te, Ibare da daw banako mo sabbay se.

¹⁸Woodin yaŋ kulu kaŋ iri boŋ, Kulu nda yaadin iri mana dinya ni gaa, Iri mana tangari goy te da ni sappa mo.

¹⁹Iri biney mana bare ka ye banda, Iri taamuyaŋey mo mana kamba ka ni fonda taŋ,

²⁰Baa day kaŋ ni n'iri tutubu zoŋey do, Ni n'iri daabu mo da buuyaŋ biya.

²¹D'iri dinya iri Irikoyo maa, Wala mo d'iri na kambe salle de-koy waani fo gaa,

²²Doŋ manti Irikoy ga woodin fisi ka kaa taray no? Zama a ga bine gundu bay.

²³Oho, ni sabbay se no i go g'iri wi zaari me-a-me, I n'iri himandi feejiyaŋ kaŋ i ga koy wi.

²⁴Ya ay Koyo, ma mo hay! Ifo se no ni ga jirbi? Ma tun, ma si wangu iri hal abada.

²⁵Ifo se no ni goono ga ni moyduma tugu? Ni goono ga dinya kayna da kankamo kaŋ i goono ga te iri se din no?

²⁶Zama iri fundey sooli hala ganda, Iri gaahamey go ga naagu laabo gaa.

²⁷Ma tun ka kay iri gaakasinay se, M'iri fansa mo ni baakasinay suujo sabbay se.