Read Zarma Psalms 46 Bible Online

Psalms 46 - Zarma bible

Psalms 46

¹Doonkoy jine bora se. Kora izey baytu fo no, Wayboro no g'a doon.

²Irikoy ya iri koruyaŋ do no, da iri gaabo mo, Gaakasinay maano-maano mo no taabi ra.

³Woodin se no iri si humburu, baa da ndunnya bare, Wala baa tondi beerey kaŋ ka sundu teeko bindo ra,

⁴Baa a harey ga kungu beeri te, i goono ga kufu kar, Baa i fuusuyaŋo ga naŋ tondi beerey ma jijiri. (Wa dangay)

⁵Isa fo go no, kaŋ haro ga Irikoy gallo bine kaanandi, Beeray-Beeri-Koyo nangoray hanna no.

⁶Irikoy go a bindo ra, gallo si zinji bo. Irikoy g'a gaakasinay za da hinay.

⁷Dumi cindey follo, mayrayey mo zinji. A na nga jinde sambu, kala ndunnya manne.

⁸Rabbi Kundeykoyo go iri banda, Yakuba Irikoyo ya iri wongu fuwo no. (Wa dangay)

⁹Wa kaa ka Rabbi goyey guna, Kurmu kaŋ cine no a te ndunnya ra.

¹⁰A ga naŋ wongey ma ban hala ndunnya me. A ga biraw ceeri, a ga yaaji mo pati, A ga torkey ton danji ra.

¹¹Wa dangay ka bay kaŋ ay no ga ti Irikoy. Ay ga beeri gumo dumi cindey do, Ay ga beeri gumo ndunnya ra mo.

¹²Rabbi Kundeykoyo go iri banda, Yakuba Irikoyo ya iri wongu fuwo no. (Wa dangay)