Read Zarma Psalms 47 Bible Online

Psalms 47 - Zarma bible

Psalms 47

¹Doonkoy jine bora se. Kora izey baytu fo no.

²Ya araŋ ndunnya dumey kulu, wa kambe kobi. Wa cilili nda farhã jinde Irikoy se.

³Zama Rabbi ya beeraykoy no kaŋ ga humburandi, Koy beeri no ndunnya kulu boŋ.

⁴A ga dumey mayray daŋ iri cire, Ndunnya dumey mo iri ce taamey cire.

⁵A ga iri tubo suuban iri se, Darza no Yakuba kaŋ a ga ba se. (Wa dangay)

⁶Irikoy kaaru nda kosongu jinde, Rabbi kaaru nda hilli jinde.

⁷Wa sifayaŋ baytu te Irikoy se, wa sifayaŋ baytu te. Wa sifayaŋ baytu te iri Koyo se. Wa sifayaŋ baytu te,

⁸Zama Irikoy ya dumey kulu Koy no. W'a sifa nda baytu kaŋ ga dondonandi.

⁹Irikoy no ga dumi cindey dabari, Irikoy goono ga goro nga koytaray karga hanna boŋ.

¹⁰Dumey mayraykoyey margu zama ngey ma ciya Ibrahim Irikoyo boroyaŋ, Zama ndunnya korayey ya Irikoy wane yaŋ no, Nga wo Beeraykoy no gumo-gumo.