Read Zarma Psalms 50 Bible Online

Psalms 50 - Zarma bible

Psalms 50

¹Asaf baytu fo no. Hinkoyo, Rabbi Irikoy salaŋ, A na ndunnya ce za wayna funyaŋ kal a kaŋyaŋ.

²Irikoy kaaro fun Sihiyona ra, Darza toonante no.

³Iri Irikoyo go kaa, a si dangay bo. Danji go ga di a jine, Danjo go ga follo mo a windanta gumo.

⁴A ga beeney ce beene, A ga ganda mo ce, zama a ma ciiti nga borey se.

⁵«W'ay hanantey margu ay se, Ngey, borey kaŋ yaŋ sappe nda ay sargay boŋ.»

⁶Beeney goono g'a adilitara baaro fe, Zama Irikoy bumbo ya ciitiko no. (Wa dangay)

⁷«Ya araŋ ay borey, wa maa, ay mo ga salaŋ. Ya Israyla, ay ga seeda ni boŋ mo. Ay no ga ti Irikoy, ni Irikoyo.

⁸Ay si kaseeti ni gaa ni sargayey se bo. Ni sargayey kaŋ i ga ton, waati kulu i go ay jine.

⁹Ay si yeeji ta ni windo ra, Wala jindiyaŋ ni hincin kurey ra.

¹⁰Manti ganji ham kulu ay wane no, Da tudu zambarey boŋ alman izey?

¹¹Ay gonda tondey kulu boŋ curayzey bayray, Hay kulu kaŋ ga nyooti farey ra mo, ay wane yaŋ no.

¹²Baa ay ga maa haray, ay si ci ni se bo, Zama ndunnya ya ay wane no, nga nda nga tooyaŋo.

¹³Ay ga yeeji ham ŋwa, Wala ay ga hincin jindi kuri haŋ no?

¹⁴Ma saabuyaŋ sargay salle Irikoy se, Ma ni sarti kulu bana Beeray-Beeri-Koyo se.

¹⁵Ma ce ay maa boŋ mo masiiba zaari ra. Ay ga ni faaba, ni mo g'ay beerandi.»

¹⁶Amma boro laalo, Irikoy goono ga ne a se: «Ifo ga ti ni kobay kaŋ se ni g'ay hin sanney ci, Hala ni n'ay sappa sambu ni me ra?

¹⁷Zama ni wongu goojiyaŋ, Ni go g'ay sanney mo furu ni banda.

¹⁸Da ni di zay, nin d'a ga te me fo, Ni ga hangasinay da zina-teerey mo.

¹⁹Ni go ga ni meyo nooyandi mo sanni laalo se, Ni deena mo goono ga gulinci ci.

²⁰Ni ga goro ka ni nya-ize beeri, Izo kaŋ ni nyaŋo hay, ni go g'a alaasiray.

²¹Ni na hayey din te, amma ay dangay. Ni go ga tammahã ay ya ni cine no. Day ay ga deeni ni gaa, ay ma ni cabe taray kwaaray.

²²Ya araŋ kaŋ ga dinya Irikoy gaa, Wa te laakal da woodin fa! Zama ay ma si araŋ nyage-nyage, faabako si no.

²³Boro kulu kaŋ na saabuyaŋ sarga no, A goono g'ay beerandi no. Boro kaŋ na nga muraadey sasabandi mo, Ay wo, Irikoy, ay g'ay faaba cabe a koy se.»