Read Zarma Psalms 55 Bible Online

Psalms 55 - Zarma bible

Psalms 55

¹Doonkoy jine bora se. I m'a doon da moolo beeri karyaŋ. Dawda baytu fo no.

²Ya Irikoy, ma hanga jeeri ay adduwa se, Ma si tugu ay ŋwaara se.

³Ma laakal ye ay gaa ka tu ay se mo. Ay bina go ga koy-da-ye te ay dooro ra. Ay go ga duray

⁴ibare jinde sabbay se, da boro laaley kankamo sabbay se, Zama i go ga laala taŋ ay boŋ, Futay mo no i go g'ay kuta nd'a.

⁵Ay bina go ga maa foyrayyaŋ gumo ay ra, Buuyaŋ humburkumay beerey kaa ay gaa.

⁶Humburkumay da gaa-jijiriyaŋ kaa ay gaa jirsi boŋ, Zici dumbay n'ay yoole mo.

⁷Hal ay ne: «Hala day ay gonda koloŋay fata cine, Doŋ kala ay ma deesi, ya koy nangu fo ka fulanzam.

⁸Doŋ kala ya koy nangu mooro fo ka zumbu saajo ra. (Wa dangay)

⁹Ay ma cahã ka koy ay tuguyaŋ nango do, ay ma koru hari nda haw bambata se.»

¹⁰Ya ay Koyo, m'i halaci, m'i deeney fay, Zama ay di toonye nda kusuuma gallo ra.

¹¹Cin da zaari i goono g'a casu ka bar-bare a birni cinaro boŋ. Taabi nda izefututaray go a bindo ra.

¹²Halaciyaŋ go no a bindo ra, Kankami nda gulinci si fay d'a batamey.

¹³Zama manti ibare no k'ay wow bo. Da yaadin no, doŋ ay ga hin suuru. Manti mo konnako no ka nga boŋ beerandi ay gaa, Doŋ ay ga tugu a se.

¹⁴Amma nin no, boro ay wadde, Ay coro no, ay naanay bora.

¹⁵Waato iri ga saaware kaano te care se, Irikoy windo ra mo iri ga bar-bare jama banda.

¹⁶Buuyaŋ ma kaa i gaa jirsi boŋ, I ma koy Alaahara nda ngey fundey, Zama laala go i nangorayey ra d'i bindo ra mo.

¹⁷Ay wo, Irikoy gaa no ay ga hẽ, Rabbi g'ay faaba mo.

¹⁸Wiciri kambu nda susuba nda zaari bindi, Ay ga guunu-guunu, ay ma duray. A ga maa ay jinda mo.

¹⁹Laakal kanay no a g'ay fundo fansa nd'a wongu kaŋ tun ay se ra. Zama borey kaŋ yaŋ goono ga gaaba nd'ay ga baa.

²⁰Irikoy kaŋ za doŋ tondoyaŋ koy no ga maa, (Wa dangay) A g'i taabandi mo, ngey kaŋ si barmay, Kaŋ yaŋ si humburu Irikoy.

²¹Boro laalo na nga kamba salle ka gaaba nda borey kaŋ yaŋ gonda amaana nd'a, A na nga sappa tunandi mo.

²²A meyo ga yuttu nda haw ji, amma a bina ra, kala wongu. A sanney bisa ji baanyaŋ, Kulu nda yaadin takuba foobanteyaŋ no.

²³Ma ni tiŋa gusam Rabbi boŋ, nga mo ga ni gaay. Abada, a si yadda adilantey ma zinji.

²⁴Amma borey kaŋ gonda himma boro wiyaŋ gaa, I ga gulinci mo, Nin, ya Irikoy, ni g'i zeeri halaciyaŋ guuso ra. I si to ngey jirbey farsi bindo bo. Day ay wo, ay ga de ni gaa.