Read Zarma Psalms 6 Bible Online

Psalms 6 - Zarma bible

Psalms 6

¹Doonkoy jine bora se. I m'a doon da moolo hamni ahakkukoy karyaŋ. Dawda wane no.

²Ya Rabbi, ma si deeni ay ga ni futa ra, Ma s'ay gooji mo ni futay korna ra.

³Ya Rabbi, m'ay suuji, zama ay lakaw parkatak. Ya Rabbi, m'ay no baani, zama ay biriyey goono ga kaama,

⁴Ay fundo mo maa doori gumo. Ni mo, ya Rabbi, kala waati fo?

⁵Ya Rabbi, ma ye ka kaa k'ay fundo faaba. M'ay faaba ni baakasinay suujo se.

⁶Zama buuyaŋ ra sinda ni fonguyaŋ, Alaahara ra mo may no ga saabu ni se?

⁷Ay farga ay hẽeni booba sabbay se. Cin kulu ay go g'ay daarijo tayandi, Ay dima mo tay d'ay mundey.

⁸Ay moy kayna bine saray sabbay se, I zeen ay yanjekaarey kulu sabbay se.

⁹Ya araŋ goy laalo teekoy kulu, wa fay nd'ay, Zama Rabbi maa ay hẽeno jinda.

¹⁰Rabbi maa ay ŋwaara. Rabbi g'ay adduwa ta.

¹¹Ay ibarey kulu, haawi nda humburkumay m'i di gumo. I ma bare, haawi m'i di sahãadin-sahãadin.