Read Zarma Psalms 63 Bible Online

Psalms 63 - Zarma bible

Psalms 63

¹Dawda baytu no kaŋ a te waato kaŋ a go Yahuda ganjo ra.

²Ya Irikoy, nin no ga ti ay Irikoyo. Ay ga ni ceeci da anniya. Ay fundo gonda ni jaw, Ay baso yangala ni se laabu kogo kaŋ gonda jaw ra, Naŋ kaŋ hari kulu si no.

³Yaadin no ay na ni guna nangu hanna ra, Zama ay ma di ni hino da ni darza.

⁴Za kaŋ ni baakasinay suujo baa da fundi gande, Ay meyo ga ni sifa.

⁵Yaadin no ay ga ni sifa ay fundo me muudu, Ay g'ay kambey sambu ni maa ra.

⁶Ay fundo ga kungu danga _boro kaŋ du|_ maani ji da ham kaŋ gonda maani boobo. Ay meyo mo ga ni sifa da me kuurey kaŋ ga farhã.

⁷Saaya kaŋ ay goono ga fongu ni gaa ay daarijo boŋ cin alwaatey ra, Kal ay ma ni miila.

⁸Zama ni ya ay gaako no. Ni fatey biyo ra mo no ay ga doon farhã sabbay se.

⁹Ay fundo goono ga sarku ni ga, Ni kambe ŋwaaro goono g'ay sambu ka gaay.

¹⁰Amma borey kaŋ yaŋ goono g'ay fundo ceeci zama ngey m'a halaci se,

¹¹Ni g'i nooyandi takuba hin se, i ga ciya zoŋey baa. I ga furo yongo ndunnya guusuyaŋo ra.

¹²Amma bonkoono ga te bine kaani Irikoy ra. Boro kulu kaŋ ga ze d'a mo, A koy ga du darza, zama i ga tangarikomey meyey daabu.