Read Zarma Psalms 67 Bible Online

Psalms 67 - Zarma bible

Psalms 67

¹Doonkoy jine bora se. I m'a doon da moolo beeri karyaŋ. Baytu no, dooni mo no.

²Irikoy ma gomni te iri se, a m'iri albarkandi mo. A ma naŋ nga moyduma ma kaari iri do haray. (Wa dangay)

³Zama i ma ni fonda bay ndunnya ra, Ni faaba mo ndunnya dumey kulu game ra.

⁴Ya Irikoy, dumey ma ni saabu, Dumey kulu ma ni sifa.

⁵Dumey biney ma kaan. I ma baytu te farhã sabbay se, Zama ni ga ciiti te dumey se da cimi, Ni ga ndunnya dumey daŋ fondo mo. (Wa dangay)

⁶Ya Irikoy, naŋ dumey ma ni saabu, Dumey kulu ma ni sifa.

⁷Laabo na nga nafa no. Irikoy kaŋ ga ti iri Irikoyo go g'iri albarkandi.

⁸Irikoy goono g'iri albarkandi. Ndunnya me-a-me ma humbur'a.