Read Zarma Psalms 7 Bible Online

Psalms 7 - Zarma bible

Psalms 7

¹Dawda hẽeno kaŋ a te baytu Rabbi se, Benyamin bora Kus boŋ.

²Ya Rabbi ay Irikoyo, ni do no ay ga tuguyaŋ do ceeci. M'ay faaba, M'ay soolam ka kaa ay gaaraykoy kulu kambe.

³Zama i ma s'ay kortu-kortu sanda muusu beeri cine kaŋ ga tooru-tooru, faabako mo si.

⁴Ya Rabbi, ay Irikoyo, hala day ay na woone yaŋ te no: Da day laala go ay kambe ra,

⁵Wala ay bana ay naanay bora gaa da goy laalo, Wala ay n'ay yanjekaaro zamba sabaabu kulu si --

⁶Naŋ ay ibara m'ay fundo kankam da gaarayyaŋ kal a m'a di. Naŋ a m'ay fundo taamu ganda, A m'ay darza mutukuru bulungu ra. (Wa dangay)

⁷Ya Rabbi, ma tun ni futa ra, Ma tun ka kay ka gaaba nda ay yanjekaarey futa. Ma mo hay ay sabbay se, ma cimi ciiti te.

⁸Dumey marga ma ni windi, Ni ma ye beene ka kaaru i boŋ.

⁹Rabbi ga ciiti te ndunnya dumey se. Ya Rabbi, ma ciiti te ay se ay adilitara hino me, Da hananyaŋo kaŋ go ay se me mo.

¹⁰Naŋ laalakoyey laala ma ban, Amma ni ma adilantey tabbatandi. Zama Irikoy ya adilitaraykoy no, A ga bine da nga gundu neesi.

¹¹Ay korayo go Irikoy do, Nga kaŋ ga bine ra adilantey faaba.

¹²Irikoy ya adilitaray ciitiko no. Oho, Irikoy ga dukur han kulu.

¹³Da boro mana bare ka tuubi, kala Irikoy ma nga takuba kaanandi. A ma haw daŋ nga birawo ra mo.

¹⁴A na buuyaŋ wongu jinayyaŋ soola a se. A na nga hangawey ciya danjikoyyaŋ.

¹⁵Guna, boro ga hay-zaŋay da laala. Oho, a ga zamba gunde sambu ka tangari hay.

¹⁶A na guusu soola, a n'a fansi. A kaŋ guusu hirrimo kaŋ a te din ra.

¹⁷A zamba ga ye a bumbo boŋ. A toonya mo ga zumbu a boŋ bindo ra.

¹⁸Ay ga saabu Rabbi se a adilitara boŋ. Ay ga sifayaŋ baytu te Rabbi kaŋ bisa ikulu maa gaa.