Read Zarma Psalms 72 Bible Online

Psalms 72 - Zarma bible

Psalms 72

¹Suleymanu wane no. Ya ay Irikoyo, ma bonkoono no ni ciitey. Ni adilitara mo, ni m'a no bonkoono izo se.

²A ma ciiti te ni borey se da adilitaray, Ni talkey mo se da cimi ciiti.

³Tondi kuukey ma kande borey se laakal kanay, Tudey mo ma kand'a adilitaray ra.

⁴A ma ciiti te borey ra talkey se; A ma laamikoyey izey faaba, A ma taabandikoy mumuru mo.

⁵I ma humburu nin waati kaŋ wayna go no, Da waati kaŋ hando go no, Hal a ma koy zamaney kulu me.

⁶A ma zumbu sanda beene hari cine, subu kaŋ i dumbu boŋ, Sanda buru hariyaŋ kaŋ ga laabo tayandi.

⁷A jirbey ra adilante ma zaada, Laakal kanay ma baa mo, kala handu sanni ma ban.

⁸A ma may teeku fa gaa ka koy teeku fa gaa mo, Da Isa Beero gaa kal a ma koy ndunnya me.

⁹Saajo gorokoy ma gurfa a jine, a ibarey ma kusa loogu.

¹⁰Tarsis da gungey bonkooney ma jangal bana, Seba da Saba bonkooney mo ma kande fooyaŋ hari.

¹¹Oho, bonkooney kulu ma sududu a se, Ndunnya dumey kulu ma may a se.

¹²Zama a ga borey kaŋ go moori ra faaba waati kaŋ i hẽ ka gaakasinay ceeci, Da taabante, da boro kaŋ sinda gaako mo.

¹³A ga bakaraw cabe talkey da laamikoyey se, A ga laamikoyey fundey faaba mo.

¹⁴A m'i fundey fansa* zamba nda toonye gaa, A diyaŋo gaa mo i kuro gonda darza.

¹⁵A ma funa, i ma Seba wura no a se mo. Borey ma adduwa te a se han kulu, I m'a sifa zaari me-a-me.

¹⁶Ntaaso ma te ka yulwa laabo tondi kuukey yolley gaa, Jeeney ma soobay ka teeni sanda Liban cine, Galley ra gorokoy mo ma zaada danga ganda subey cine.

¹⁷A maa ma tabbat hal abada, A maa ma yandi duumi nda wayna go no. I ma borey albarkandi a maa gaa, Ndunnya dumey kulu ma ne a se albarkante.

¹⁸I ma Rabbi Irikoy, Israyla Irikoyo, sifa, Nga kaŋ ga dambara goyey te, nga hinne.

¹⁹I m'a maa darzakoyo sifa hal abada. Ndunnya kulu ma to d'a darza. Amin! Amin! Yasse ize Dawda adduwey nooya, i ban.