Read Zarma Psalms 73 Bible Online

Psalms 73 - Zarma bible

Psalms 73

¹Asaf baytu fo no. Daahir, Irikoy ya gomnikoy no Israyla se, Ngey kaŋ gonda bine hanante se no.

²Amma ay wo, ay cey ga ba ka kati, Kayna ka cindi ay taamuyaŋey ma tansi.

³Zama ay bina canse foomantey se, Waato kaŋ ay di laalakoyey arzaka.

⁴Zama i buuyaŋ ra sinda doori maayaŋ durayyaŋ, I gaabey go toonante.

⁵I si taabi ra sanda boro cindey cine, I mana masiiba te i se sanda boro cindey cine.

⁶Woodin se no boŋbeeray goono ga sarku i jindey gaa sanda jinde gaa taalam hari cine, I gonda toonye ga daŋ sanda bankaaray cine.

⁷I moy go ga dor-doru maani sabbay se, I biney fonguyaŋey baa gumo.

⁸I goono ga hahaaray te, laala ra mo i ga kankami ci. I goono ga niine jare ka salaŋ,

⁹I na ngey meyey ye beene ka gaaba nda beeney, I deeney mo goono ga bar-bare ganda.

¹⁰Woodin se no a borey ga ye ka kaa neewo, I goono ga hari haŋ gumo.

¹¹Foomantey din goono ga ne: «Mate no Irikoy ga te ka bay? Bayray woofo no go Beeray-Beeri-Koyo do?»

¹²A go, woone yaŋ, ngey no ga ti laalakoyey: I goono ga goro baani samay duumi, I goono ga tonton da arzaka.

¹³Daahir, yaamo no ay n'ay bina hanandi, Ay n'ay kambey nyun da taali-jaŋay.

¹⁴Zama zaari me-a-me masiiba no ay goono ga haŋ, Da goojiyaŋ mo susubay kulu.

¹⁵D'ay ne: «Yaadin cine no ay ga salaŋ,» A go, doŋ ay na ni izey zamana amaana ŋwa.

¹⁶Waato kaŋ ay ceeci ay ma woodin bay, kala a ciya haŋ kaŋ gaabu ay se.

¹⁷Day waato kaŋ ay furo Irikoy nangu hananta ra, Gaa no ay laakal d'i bananta.

¹⁸Daahir, ni n'i daŋ tansi nangey ra, Ni n'i furu halaci zulliyaŋey do.

¹⁹Guna mate kaŋ cine i kaŋ farap! folloŋ, I n'i haabu ka ban parkatak da humburkumay beeriyaŋ.

²⁰Sanda hindiri cine waati kaŋ boro mo hay, Yaadin cine no, ya ay Koyo, da ni mo hay, Ni ga donda i alhaalo.

²¹Waati kaŋ a dooru ay gaa, A n'ay gooru mo ay bina ra,

²²Ay na alman alhaali te, ay jaŋ bayray mo, Hal ay hima sanda ganji ham ni jine.

²³Kulu nda yaadin, waati kulu ay go ni banda, Ni n'ay kambe ŋwaaro di ka gaay.

²⁴Ni g'ay candi nda ni saawara, Woodin banda ni g'ay ta ay ma koy darza ra.

²⁵May no ay se beene da manti nin no? Ndunnya ra mo sinda boro fo kaŋ g'ay beejandi kala nin.

²⁶Ay bina d'ay hamo gaze, Amma Irikoy ga ti ay bina tondi daaro, D'ay baa mo hal abada.

²⁷Zama a go, borey kaŋ yaŋ ga mooru nin ga halaci. Ngey kaŋ yaŋ fay da nin ka amaana ŋwaari gana, I kulu ni g'i halaci.

²⁸Amma a boori ay se ya maan Irikoy, Ay na Rabbi, Koy Beero te ay koruyaŋ do, Zama ay ma ni goyey kulu baaru dede.