Read Zarma Psalms 76 Bible Online

Psalms 76 - Zarma bible

Psalms 76

¹Doonkoy jine bora se. I m'a doon da moolo beeri karyaŋ. Asaf baytu fo no, dooni mo no.

²I ga Irikoy bay Yahuda ra, a maa beeri Israyla ra.

³Salem ra no a nangora go, a gora do mo go Sihiyona ra.

⁴Noodin no a na hangawey kaŋ gonda danji ceeri-ceeri, Da koray, da takuba, da wongu jinayey mo. (Wa dangay)

⁵Ni gonda darza beeri da gaakuri mo ka bisa wongu arzaka citila,

⁶I na bine gaabikooney jinayey ku wongu ra, I kani ka jirbi kaŋ sinda tunyaŋ, Wongaarey din kulu ra sinda boro kaŋ ga hin ka nga kambe sambu.

⁷Ya Yakuba Irikoyo, ni deeno se torkey da bariyey kulu kaŋ jirbi tiŋo ra.

⁸Nin no ga humburandi gumo, nin no. May no ga kay ni jine da ni futu?

⁹Ciiti kaŋ fun beene, ni naŋ i ma maa ra, Ndunnya mo humburu, a te siw

¹⁰waato kaŋ Irikoy tun ciiti teeyaŋ sabbay se, Zama nga ma ndunnya ra lalabukoyey faaba. (Wa dangay)

¹¹Zama daahir boro futay ga ni sifawo te. Futay cindo mo, ni g'a te guddama.

¹²Wa sartiyaŋ sambu k'i toonandi Rabbi araŋ Irikoyo se. Borey kulu kaŋ goono g'a windi ma kande fooyaŋ hari nga kaŋ to i ma humbur'a se.

¹³A ga mayraykoyey bonjareyaŋo ban. Irikoy ya humburkumay hari no ndunnya bonkooney se.