Read Zarma Psalms 77 Bible Online

Psalms 77 - Zarma bible

Psalms 77

¹Doonkoy jine bora se. I m'a doon da Yedutun subo. Asaf baytu no.

²Ay jinde no ay go ga hẽ d'a Irikoy gaa, Oho, ay jinde no ay go ga tunandi Irikoy gaa, Nga mo ga hanga jeeri ay se.

³Ay taabo zaaro ra ay na Koy Beero ceeci, Cin mo ay kambe go ga salle, a mana dusu. Ay fundo wangu ka yaamaryaŋ ta.

⁴D'ay fongu Irikoy gaa, ay laakalo no ga tun. D'ay ga miila mo, ay fundo no ga kasam. (Wa dangay)

⁵Ni go g'ay mo-kuurey di i ma goro feerante. Ay boŋo mo haw kala ay si du ka salaŋ.

⁶Ay fongu waato jirbey, za doŋ-doŋ jiirey nooya.

⁷Cin ra ay ga fongu nda ay doono, Ay ga saaware d'ay bina, Ay biya mo go ga fintalyaŋ te.

⁸Ay Koyo ga boro furu no hal abada? A si ye ka yadda no koyne?

⁹A baakasinay suujo ban hal abada no? A alkawlo mo tun hal abada abadin no?

¹⁰Wala Irikoy dinya gomni teeyaŋ no? A futa ra a na bakaraw daabu no, wala? (Wa dangay)

¹¹Ay ne: «Woone ga ti ay bine sara: Kaŋ Beeray-Beeri-Koyo kambe ŋwaari si no danga waato wano cine.»

¹²Ay ga fongu Rabbi goyey, Daahir ay ga fongu ni waato dambara goyey.

¹³Ay ga soobay ka ni goyey kulu guna nda laakal, Ay ga miila mo ni te-goyey boŋ.

¹⁴Ya Irikoy, ni fonda ya hananyankoy no. Irikoy woofo no ka bara nda beeray sanda iri Irikoyo cine?

¹⁵Nin no ga ti Irikoy kaŋ ga dambara goyyaŋ te, Ni na ni gaabo cabe dumey game ra.

¹⁶Ni kambe no ni na ni borey fansa* nd'a, Kaŋ ga ti Yakuba nda Yusufu izey. (Wa dangay)

¹⁷Ya Irikoy, harey di nin, harey di nin, I bibiri, guusuyaŋey jijiri.

¹⁸Burey na hari taŋ ka dooru, beene batamey kaati. Ni hangawey mo ga koy, i ga ye.

¹⁹Ni kaatiyaŋ jinda go alma haw beero ra, Maliyaŋey na ndunnya kaarandi, Laabo jijiri ka zinji-zinji.

²⁰Ni fonda go teeku ra, Ni fondayzey mo go hari bambatey ra, Ni ce gurbey mo, borey s'i bay.

²¹Ni na ni borey candi Musa nda Haruna kambe ra, Sanda feeji kuru cine.