Read Zarma Psalms 78 Bible Online

Psalms 78 - Zarma bible

Psalms 78

¹Asaf dooni fo no. Ya ay borey, wa hangan ay asariya se, W'araŋ hanga jeeri k'ay me sanney hangan.

²Ay g'ay meyo feeri nda yaasay, Ay ma waato sanney kaŋ ga sandi yaŋ ci,

³Wo kaŋ yaŋ iri maa, iri g'i bay, Iri kaayey mo ci iri se.

⁴Iri s'i tugu i izey se, Amma iri ga Rabbi sifawey, da Rabbi gaabo, D'a dambara goyey kulu kaŋ a te baaru dede zamana kaŋ ga kaa borey se.

⁵Zama a na seeda kayandi Yakuba ra, A na asariya daŋ Israyla ra, Wo kaŋ a lordi iri kaayey se, Zama i ma ngey izey bayrandi nd'a.

⁶Hala zamana kaŋ ga kaa din m'i bay, Danga izey kaŋ yaŋ i ga hay nooya, Ngey mo ma tun ka ci ngey izey se,

⁷Zama i ma ngey deyaŋ sinji Irikoy gaa, I ma si dinya Irikoy goyey gaa, Amma i ma haggoy d'a lordey.

⁸I ma si goro ka ciya sanda ngey kaayey cine, Zamana kaŋ boŋ ga sandi, kaŋ ga ture mo, Zamana kaŋ mana nga bina soola, Kaŋ a biya mana kay da naanay Irikoy gaa.

⁹Ifraymu izey, soojeyaŋ no kaŋ gonda birawyaŋ ga jare, Amma i na banda bare wongo hane.

¹⁰I mana ngey da Irikoy game ra sappa haggoy, I wangu ka dira a asariya ra.

¹¹I dinya a goyey d'a dambara harey kaŋ a cab'i se,

¹²Goyyaŋ kaŋ ga boro di takooko no a te i kaayey jine, Misira laabo ra, da Zowan faro ra mo.

¹³A na teeku fay, a na haro gaay, A n'a te citila, a naŋ i ma gana ka bisa a ra mo.

¹⁴Zaari a n'i candi nda beene buru, cin mo da danji kaari.

¹⁵A na tondey kortu saajey ra k'i haŋandi, Danga day teeku guusey gaa no.

¹⁶Tondi ra a na gooruyaŋ candi ka kaa taray, A naŋ harey ma zuru ka dandi sanda isayaŋ cine.

¹⁷Kulu nda yaadin i soobay ka zunubi te a se, I go ga murte Beeray-Beeri-Koyo gaa laabu kogo ra.

¹⁸I na Irikoy si ngey biney ra waato kaŋ i na ham ceeci ngey biniya ra.

¹⁹Oho, i salaŋ ka gaaba nda Irikoy, I ne: "Day Irikoy gonda hina a ma taabal soola saajo wo ra no?

²⁰A go, a na tondo kar hala hari bagu ka fatta, Goorey te yaa ka mun. A gonda hina kaŋ ga buuru mo no, wala? A ga hin ka ham soola ka jisi nga borey se no?"

²¹Woodin se no Rabbi maa, a futu mo gumo. Danji di ka gaaba nda Yakuba, Futay mo tun ka gaaba nda Israyla,

²²Zama i mana Irikoy cimandi, i mana de a faaba gaa mo.

²³Kulu nda yaadin a na burey lordi beene, A na beene meyey fiti,

²⁴A na Manna* gusam i se, Sanda beene hari cine, i ma ŋwa. A n'i no beene ntaaso.

²⁵Adam-izey na malaykey ŋwaaro ŋwa. A na ŋwaari samba i se kal i kungu.

²⁶A daŋ wayna funay haw ma faaru beena ra. Nga hino no a na hawo gaaray d'a dandi kamba haray.

²⁷A na ham gusam i se sanda kusa cine, Curayze fatakoy sanda teeku taasi baayaŋ cine no.

²⁸A naŋ i ma soobay ka kaŋ jama gata bindo ra, I nangorayey windanta.

²⁹Borey binde ŋwa kal i kungu gumo, Rabbi na i madde kaa i gaa.

³⁰I laamo mana fun -- hamey go i meyey ra jina --

³¹Kala Irikoy futu i gaa. A na i ra borey kaŋ yaŋ naasu nd'i kulu wi, A na Israyla sahãkooney kar.

³²Kulu nda yaadin, i soobay ka zunubi te ka tonton, I mana a dambara goyey mo cimandi.

³³Woodin se no a n'i jirbey halaci yaamo, I jiirey mo halaci jirsi boŋ.

³⁴Kaŋ a n'i wi, gaa no i n'a ceeci, I bare ka Irikoy ceeci da anniya.

³⁵I fongu kaŋ Irikoy no ga ti ngey tondo, Irikoy Beeray-Beeri-Koyo mo i Fansakwa no.

³⁶Kulu nda yaadin i na me-kaanay te a se, I taari a se mo da ngey deeney.

³⁷Zama i biney mana sinji a do haray, I mana goro ka ciya naanaykoyyaŋ a sappa ra mo.

³⁸Amma nga din, zama a go toonante da bakaraw, A se no a n'i taaley yaafa i se, A man'i halaci. Oho, sorro boobo a futa ga bare, A si nga dukuro kulu funsu.

³⁹A fongu kaŋ ngey wo gaahamyaŋ hinne day no, Haw kaŋ ga bisa, kaŋ si ye ka kaa koyne.

⁴⁰Sorro marge no i murte a gaa saajo ra, I n'a bine sara taasi beero ra.

⁴¹Sorro boobo mo i bare, i na Irikoy si, I na yanje ceeci Israyla wane Hananyankoyo gaa.

⁴²I mana fongu a kambe gaabo, Wala mo zaaro kaŋ a n'i fansa ka kaa i yanjekaarey kambe ra.

⁴³Mate kaŋ cine a na nga alaamey te Misira ra, Da nga dambara goyey kaŋ a te Zowan faro ra.

⁴⁴A na Misira isey bare ka te kuri, I goorey mo, kala i si hin ka haŋ i gaa.

⁴⁵A na hamni zugulayaŋ donton i gaa, kaŋ yaŋ n'i ŋwa, Balancawyaŋ* mo n'i halaci.

⁴⁶A na i fari albarka nooyandi do izey se, I taabi goyey mo, a n'i nooyandi doy se.

⁴⁷A na i reyzin* tiksey halaci nda gari, I durmi nyaŋey mo, leema n'i hasara.

⁴⁸A na i almaney nooyandi gari se, I alman kurey mo, beene maliyaŋ n'i ton ka wi.

⁴⁹A na nga futay korna gusam i boŋ, Dukuri nda futay da taabi, Hasaraw malaykey kunda nooya.

⁵⁰A na fondo hanse nga futa se, A man'i fundey suuban ka faaba buuyaŋ gaa, Amma a n'i fundey nooyandi balaaw se.

⁵¹A na hay-jiney kulu kar Misira ra, Kaŋ ga ti i gaabi sintina Ham banda kuuru fuwey ra.

⁵²Amma a na nga borey kaa taray sanda feejiyaŋ cine, A na jina candi i se saajo ra sanda alman kuru.

⁵³A na fondo candi i se baani samay, hal i mana humburu, Amma teeko n'i ibarey gon.

⁵⁴A kand'ey nga laabu hananta hirro me gaa, Ka koy tondo kaŋ a kambe ŋwaaro day za doŋ din do.

⁵⁵A na dumi cindey gaaray i jine. Neesiyaŋ boŋ no a na laabo fay-fay i se tubu, A naŋ Israyla kundey ma goro i windey ra.

⁵⁶Kulu nda yaadin i na Beeray-Beeri-Koyo Irikoy si, I murte a gaa, i man'a seedey haggoy mo.

⁵⁷Amma i bare ka amaana ŋwaari te sanda mate kaŋ cine i kaayey te, I siiri ka kamba sanda biraw laalo.

⁵⁸Zama i n'a zokoti nda ngey tudey boŋ sududuyaŋ nangey, I naŋ canse m'a di da ngey jabuyaŋ toorey.

⁵⁹Waato kaŋ Irikoy maa, a futu, a na Israyla fanta gumo,

⁶⁰Hal a na nangora kaŋ go Silo furu, Kaŋ ga ti hukumo kaŋ a sinji borey game ra.

⁶¹A na jama gaabo nooyandi tamtaray se, A darza mo yanjekaaro kambe ra.

⁶²A na nga borey nooyandi mo takuba se, A futu mo nga wane jama se.

⁶³Danji n'i sahãkooney ŋwa, I wandiyey mo mana du hiijay doono.

⁶⁴Takuba n'i alfagey* zeeri, I wayborey kaŋ kurnyey bu mo mana bu seew te.

⁶⁵Gaa no Koy Beero mo hay sanda boro kaŋ tun jirbi gaa, Sanda gaabikooni kaŋ goono ga kuuwa duvan* haŋyaŋ se.

⁶⁶A na nga yanjekaarey kar i ma ye banda, A naŋ i ma di foyray hal abada.

⁶⁷A wangu Yusufu kuuru fuwo mo, A mana Ifraymu kunda suuban,

⁶⁸Amma a na Yahuda kunda suuban, Kaŋ ga ti Sihiyona tondo kaŋ a ga ba.

⁶⁹A na nga Nangu Hananta cina mo sanda tondi kuukuyaŋ, Sanda ndunnya cine kaŋ a sinji hal abada.

⁷⁰A na nga tamo Dawda suuban, A n'a sambu feeji kaliyaŋ ra,

⁷¹Feejey kaŋ ga naanandi ganayaŋ do no a n'a sambu ka kande, Zama a ma Rabbi jama Yakuba kuru, Kaŋ ga ti nga wane dumo Israyla.

⁷²Dawda n'i kuru mo nga bine cimi toonante boŋ, A n'i candi nda nga kamba gonitara.