Read Zarma Psalms 85 Bible Online

Psalms 85 - Zarma bible

Psalms 85

¹Doonkoy jine bora se. Kora izey baytu fo no.

²Ya Rabbi, ni boori ni laabo se. Ni ye ka kande Yakuba, a ma fun tamtaray.

³Ni na ni borey zunubo yaafa, Ni n'i zunubey kulu daabu. (Wa dangay)

⁴Ni na ni futa kulu candi ka kaa, Ni bare ka fay da ni futay korna.

⁵Ya iri faaba Irikoyo, m'iri bare ka ye. Ma naŋ ni dukuro kaŋ ni gonda iri se ma ban.

⁶Ni ga futu iri se no hal abada? Ni ga ni futa kuukandi ka koy hala zamaney kulu me no?

⁷Wala ni si ye k'iri funandi koyne, Zama ni borey ma farhã ni do?

⁸Ya Rabbi, ma ni baakasinay suujo cabe iri se, M'iri no ni faaba mo.

⁹Ay ga hangan ka maa haŋ kaŋ Rabbi Irikoy ga ci, Zama a ga laakal kanay sanni te nga borey se, Kaŋ ga ti a wane hanantey. Day i ma si ye ka bare saamotaray do haray koyne.

¹⁰Daahir, a faaba ga maan borey kaŋ yaŋ ga humbur'a gaa, Zama darza ma goro iri laabo ra.

¹¹Baakasinay suuji nda cimi kubay, Adilitaray da laakal kanay na care garbe sunsum.

¹²Cimi go ga zay ka fun ganda laabo ra, Adilitaray mo go beene ga fonnay.

¹³Oho, Rabbi ga gomni no, iri laabo mo ga nga nafa hay.

¹⁴Adilitaray ga koy Rabbi jine, A ga nga ce gurbey ciya ganayaŋ fondo.