Read Zarma Psalms 88 Bible Online

Psalms 88 - Zarma bible

Psalms 88

¹Kora izey baytu fo no. Doonkoy jine bora se. I m'a doon da seese karyaŋ. Heman Ezra bora baytu fo no.

²Ya Rabbi, ay faaba Irikoyo, Cin da zaari ay hẽ ni jine.

³Naŋ ay adduwa ma furo ni do. Ma ni hanga jeeri ka maa ay hẽeno se.

⁴Zama ay fundo go ga to da masiiba maayaŋ, Ay fundo go ga maan Alaahara gaa mo.

⁵I g'ay lasaabu borey kaŋ yaŋ ga gunguray ka koy guuso ra banda, Ay ga hima boro kaŋ sinda gaabi.

⁶Furante no ay go buukoy ra, danga borey kaŋ yaŋ i wi, Kaŋ yaŋ ga kani saaray ra, Borey kaŋ yaŋ ni si ye ka fongu i gaa koyne, Dumbanteyaŋ no, i fun ni kamba ra.

⁷Ni n'ay jisi guuso ra hala ganda, Kubay nangey ra, guusuyaŋey ra.

⁸Ni futa go g'ay naan. Ni n'ay taabandi nda ni bondayey kulu. (Wa dangay)

⁹Ni n'ay corey moorandi ay, Ni n'ay ciya fanta hari i do. Ay go daabante, ay si hin ka fatta.

¹⁰Ay mwa suugu taabi sabbay se. Ya Rabbi, han kulu ay na ni ce, Ay n'ay kambey salle ni do haray.

¹¹Ni ga dambara goyyaŋ te buukoy se no? Buuko biyey ga tun ka ni sifa, wala? (Wa dangay)

¹²I ga ni baakasinay suujo baaru dede saaray ra no? Wala ni naanayo mo halaciyaŋ ra?

¹³I ga ni dambara goyey bayrandi kubay ra no? I ga ni adilitara mo bayrandi dinyayaŋ laabu ra, wala?

¹⁴Amma nin, ya Rabbi, ni gaa no ay hẽ gaakasinay se, Susubay mo ay adduwey ga koy ni jine.

¹⁵Ya Rabbi, ifo se no ni n'ay fundo hibandi? Ifo se no ni na ni moyduma tugu ay se?

¹⁶Za ay go zanka ay na taabi haŋ, A go, ay ga ba ka bu mo. Ay go ni humburkumay beerey haŋyaŋ bindo ra, Ay boŋ haw.

¹⁷Ni futay korna gana ay boŋ, Ni humburkumay beerey n'ay halaci.

¹⁸I n'ay windi sanda hari boobo zaari me-a-me, I n'ay koli ka windi ce folloŋ.

¹⁹Ni _n'ay|_ baako da hangasin kulu moorandi ay, Ay mo-ka-bayray borey mo go kubay ra.