Read Zarma Psalms 89 Bible Online

Psalms 89 - Zarma bible

Psalms 89

¹Ezra bora Etan baytu fo no.

²Ay ga Rabbi baakasinay suujey baytu hal abada. Ay meyo no ay ga ni naanayo baaru seeda nd'a zamaney kulu se.

³Zama ay ne: «Baakasinay suuji ga tonton hal abada, Ni ga ni naanayo sinji hala beeney ra.»

⁴Ni ne: «Ay na alkawli sambu ay suubananta se, Ay ze ay tamo Dawda se

⁵ka ne: ‹Ay ga ni dumo sinji hal abada, Ay ma ni karga mo tabbatandi hala ka koy zamaney kulu gaa.› » (Wa dangay)

⁶Ya Rabbi, beeney ga ni dambara goyey sifa, I ga ni naanayo mo sifa hanantey marga jama ra.

⁷Zama may no ka bara beene kaŋ i ga deedandi Rabbi gaa? Hinkoyey izey ra, may no ga hima Rabbi?

⁸Irikoy ya humburkumay hari no hanantey faada ra, Dambarandiyankoy mo no ka bisa borey kulu kaŋ goono g'a windi.

⁹Ya Rabbi Irikoy Kundeykoyo, May no ga ti gaabikoy sanda ni cine, ya Rabbi Hinkoyo? Ni naanayo mo go ni windanta.

¹⁰Ni ga teeko boŋbeera dabari, Waati kaŋ bonday beerey ga tun ka ciciri, Ni ga i kanandi no.

¹¹Ni bumbo no ka Rahab ceeri-ceeri, Sanda nga kaŋ i wi cine. Ni na ni ibarey say-say da ni kambe gaabikoono.

¹²Beeney ya ni wane no, ganda laabo mo ni wane no. Ndunnya da nga tooyaŋo, nin no k'i sinji.

¹³Azawa da dandi kamba, nin no k'i taka, Tabor da Hermon goono ga farhã kuuwa te ni maa ra.

¹⁴Ni gonda kambe gaabikooni, Ni kambe jasa ya gaabikooni no, Ni kambe ŋwaaro mo beeraykoy no.

¹⁵Adilitaray da cimi ciiti, ngey no ga ti ni karga tiksa. Baakasinay suuji nda cimi no go ga dira ni jine.

¹⁶Albarkante no dumo din kaŋ ga waani ni sifayaŋ, Ya Rabbi, i goono ga dira ni moyduma kaaro ra.

¹⁷I ga farhã ni maa ra zaari me-a-me, Ni adilitara ra mo no i du beeray.

¹⁸Zama nin no ga ti i gaabo darza, ni yaddayaŋo ra no ni g'iri hillo tunandi.

¹⁹Zama iri korayo ya Rabbi wane no, Sanda iri Bonkoono, Israyla wane Hananyankoyo nooya.

²⁰Waato no ni salaŋ ni ganakoy se bangandi ra ka ne: «Ay na gaakasinay dake bora kaŋ gonda hina din boŋ. Ay na boro fo kaŋ i suuban borey ra beerandi.

²¹Ay du ay tamo Dawda, ay n'ay ji hananta tuusu a gaa.

²²A do no ay kamba ga tabbat, ay kamba g'a gaabandi.

²³Ibare s'a tilasandi a ma nooru nda hari bana, Laala izey mo s'a taabandi.

²⁴Ay g'a yanjekaarey kar ka zeeri a jine, Ay ma borey kaŋ yaŋ ga konn'a mo kar.

²⁵Amma ay naanayo d'ay baakasinay suujo ga goro a banda, Ay maa ra mo no a hillo ga beeri.

²⁶Ay g'a kambe dake teeko boŋ, A kambe ŋwaaro mo isey boŋ.

²⁷A g'ay ce ka ne: ‹Nin no ga ti ay Baaba, D'ay Irikoyo, d'ay faaba tondi daaro mo.›

²⁸Ay mo g'a ciya ay hay-jina, Kaŋ gonda beeray ka bisa i kulu ndunnya bonkooney ra.

²⁹Ay ga haggoy d'ay baakasinay suujo a do haray hal abada, Ay g'ay alkawlo mo tabbatandi a se.

³⁰Ay ga naŋ a banda ma duumi hal abada, A karga mo sanda beene jirbey cine.

³¹D'a izey fay d'ay asariya, i mana ay ciitey gana mo,

³²D'i n'ay hin sanney daaru, I mana ay lordey haggoy mo,

³³Waati din gaa no ay ga kaa i lordi daaruyaŋo gaa da goobu, Ya kaa i taaley gaa mo da barzu.

³⁴Amma ay s'ay baakasinay suujo hibandi ka kaa a gaa parkatak bo, Ay si fafagay goy te mo ay naanayo ra.

³⁵Ay s'ay alkawlo feeri, Haŋ kaŋ fun ay me ra mo, ay s'a barmay.

³⁶Sorro fo no ay ze ay hananyaŋo boŋ, Ay si tangari Dawda se bo,

³⁷Nga ga ti: a banda ga tabbat hal abada, A karga mo sanda wayna cine no ay jine.

³⁸A ga sinji sanda hando cine hal abada, Sanda seeda naanaykoy kaŋ go beene batama ra no.» (Wa dangay)

³⁹Amma ni wane suubananta, ni n'a furu no, Ni futu a se gumo mo.

⁴⁰Ni na alkawlo kaŋ ni sambu ni tamo se fanta, Ni n'a koytara fuula zeeri k'a ziibandi.

⁴¹Ni n'a birni cinarey kulu bagu-bagu, Ni n'a gallo ciya kurmu.

⁴²Fonda ganakoy kulu go g'a ku, A ciya wowi hari nga gorokasiney se.

⁴³Ni n'a yanjekaarey kambe ŋwaaro tunandi, Ni naŋ a ibarey kulu ma farhã.

⁴⁴Oho, ni n'a takuba me kaana bare, Ni man'a gaabandi wongu ra.

⁴⁵Ni n'a darza wi, ni n'a koytaray karga catu ganda.

⁴⁶Ni n'a zankataray jirbey dunguriyandi, Ni n'a daabu nda haawi. (Wa dangay)

⁴⁷Ya Rabbi, kala waatifo? Ni ga soobay ka tugu no hal abada? Waatifo no ni futa kaŋ ga ŋwa sanda danji cine wo ga ban?

⁴⁸Ma fongu kaŋ ay aloomaro si ku, Ma fongu mate kaŋ ni na Adam-izey kulu taka i ga ciya yaamo.

⁴⁹Man bora kaŋ ga funa, a ma jaŋ ka di buuyaŋ? Boro kaŋ ga nga fundo faaba Alaahara kambe, A go no, wala? (Wa dangay)

⁵⁰Ya ay Koyo, man ni waato baakasinay suujey, Wo kaŋ yaŋ ni ze d'a Dawda se ni naanayo ra?

⁵¹Ya ay Koyo, ma fongu wowey kaŋ ni tamey go ga haŋ, Mate kaŋ cine ay go ga dumi cindey kulu wowey jare ay ganda ra,

⁵²Nangey kaŋ ni ibarey na wowey te, ya Rabbi, Nangey kaŋ i na ni wane suubananta ce gurbey wow.

⁵³I ma Rabbi sifa hal abada! Amin! Amin!