Read Zarma Psalms 92 Bible Online

Psalms 92 - Zarma bible

Psalms 92

¹Asibti* hane baytu.

²Rabbi se saabuyaŋ ga boori. Ya Beeray-Beeri-Koyo, i ma sifaw baytu te ni maa gaa, Nga mo ga boori.

³I ma ni baakasinay suujo ci susubay, Ni naanayo mo cin kulu,

⁴Da moolo beeri hamni way koy, da moolo kayna mo, Da moolo beeri kaŋ ga tu jinde.

⁵Zama ni goyo do, ya Rabbi, ni n'ay bina kaanandi. Ay ga farhã baytu te ni kambe goyey sabbay se.

⁶Ya Rabbi, man ni te-goyey beera misa! Ni fonguyaŋey ga guusu gumo.

⁷Boro alman alhaalikoy si bay, Saamo mo si faham da woone:

⁸Waati kaŋ cine laalakoyey ga zay ka fun sanda subu cine, Saaya kaŋ cine laala goy teekoy kulu ga zaada, I ma halaci hal abada sabbay se no.

⁹Amma nin, ya Rabbi, ni ya Beeraykoy no hal abada.

¹⁰Zama a go, ni ibarey, ya Rabbi, Zama a go, ni ibarey ga halaci, Laala goy teekoy kulu ga say-say.

¹¹Amma ni n'ay hillo tunandi sanda haw-bi wane cine, I n'ay tuusu nda ji taji.

¹²Ay moy n'ay batandikoy guna nda farhã, Ay hangey maa laala goy teekoy kaŋ yaŋ ga tun ay se baaru.

¹³Adilante ga zaada sanda sabb'ize cine, A ga beeri sanda Liban ra sedre* nya cine.

¹⁴Ngey kaŋ yaŋ i tilam Rabbi windo ra ga zaada iri Irikoyo windi batama ra.

¹⁵I ga soobay ka hay baa ngey zeena ra, I ga goro nda maani nda tayyaŋ,

¹⁶Zama i ma cabe kaŋ Rabbi ya haŋ kaŋ ga saba teeko no. Ay tondi daaro no, a ra sinda adilitaray-jaŋay mo.