Read Zarma Psalms 94 Bible Online

Psalms 94 - Zarma bible

Psalms 94

¹Ya Rabbi, banayaŋ Irikoyo, Nin, Irikoy banayankoy, ma kaari zortandi!

²Ya ndunnya Ciitikwa, ma tun ka kay! Ma bana boŋbeeraykoyey gaa.

³Ya Rabbi, hala waati fo? Waati fo no laalakoyey ga fay da ngey boŋ zamuuyaŋ?

⁴I goono ga sanni yaamo dooru, I goono ga boŋbeeray sanniyaŋ te. Laala goy teekoy kulu goono ga fooma.

⁵Ya Rabbi, i goono ga ni borey bagu-bagu, I na ni wane borey taabandi.

⁶I goono ga wayboro kaŋ kurnye bu, Da yaw, da alatuumi mo wi.

⁷I ga ne mo: «Rabbi si di. Yakuba Irikoyo si laakal ye bo.»

⁸Ya araŋ, borey ra alman laakalkoyey, wa haggoy fa! Araŋ mo saamey, waati fo no araŋ ga te laakal?

⁹Nga kaŋ na hanga sinji, nga wo si maa, wala? Wala mo nga kaŋ na mo te, a si di no?

¹⁰Nga kaŋ ga dumi cindey gooji si kaseeti bo? Nga kaŋ ga boro dondonandi bayray.

¹¹Rabbi ga boro miiley bay, kaŋ yaamoyaŋ no.

¹²Ya Rabbi, albarkante no boro kaŋ ni ga gooji, Ni g'a dondonandi mo da ni asariya.

¹³Zama ni m'a no fulanzamay k'a waa taabi jirbey, Hal i ga guusu hirrimi fansi laalakoyey se.

¹⁴Zama Rabbi si fay da nga jama, A si nga waney furu mo.

¹⁵Zama ciiti ga ye ka ciya adilitaray wane, Borey kulu kaŋ bine ga saba mo g'a gana.

¹⁶May no ga furo ay se ka gaaba nda laala goy teekoy? May no ga kay ka gaaba nda taali-teerey ay se?

¹⁷Da manti kaŋ Rabbi no ga ti ay Gaakwa, Doŋ a si gay kaŋ ay fundo ga goro siw nango ra.

¹⁸Ya Rabbi, saaya kaŋ cine ay ne ay ce ga tansi, Ni baakasinay suujo n'ay gaay.

¹⁹Karhã boobo kaŋ go ay gaa waate ni kunfayaŋey goono g'ay bine kaanandi.

²⁰Laala karga kaŋ ga zamba dabari te hin sanni boŋ, A ga gorokasinay da nin no?

²¹Wuup, folloŋ! i tun adilante fundo se, I goono ga boro kaŋ sinda taali zeeri nda buuyaŋ ciiti.

²²Amma Rabbi ya ay cinari kuuko no, Ay Irikoyo mo, ay koruyaŋ tondo mo no.

²³A n'i taaley ye i boŋ, A g'i tuusu i laalayaŋo ra, Rabbi iri Irikoyo g'i tuusu.