Read Zarma Psalms 96 Bible Online

Psalms 96 - Zarma bible

Psalms 96

¹Wa baytu taji te Rabbi se! Ya araŋ ndunnya kulu, wa baytu Rabbi se.

²Wa baytu Rabbi se, w'a maa albarka sifa. W'a faaba baaru hanna fe hunkuna nda suba.

³W'a darza dede dumi cindey game ra, A dambara goyey mo dumey kulu game ra.

⁴Zama Rabbi ya Beeraykoy no, A to sifayaŋ beeri gumo. A to i ma humbur'a mo ka bisa de-koyey kulu.

⁵Zama dumi cindey de-koyey kulu tooruyaŋ day no, Amma Rabbi no ka beeney te.

⁶Beeray da koytaray darza go a jine, Gaabi nda gaakuri go no a Nangu Hananta ra.

⁷Ya araŋ dumey kulu almayaaley, wa Rabbi seeda! Wa Rabbi darza d'a gaabo seeda.

⁸Wa Rabbi darza kaŋ ga saba nd'a maa seeda. Wa kande ŋwaari sargay ka furo a windo batamey ra.

⁹Wa sududu Rabbi se, zama a gonda darza hanno. Ya araŋ ndunnya kulu, wa jijiri a jine.

¹⁰Dumi cindey ra i ma ne: «Rabbi no ga may! Daahir no ndunnya sinji hala mate kaŋ a si zinji. Rabbi ga ndunnya dumey ciiti da haŋ kaŋ ga saba.»

¹¹Beeney ma maa kaani, ganda mo ma farhã, Teeko ma dundu, nga nda nga tooyaŋo.

¹²Saajo mo ma zamu, nga nda hay kulu kaŋ go a ra, Waato din gaa no, saajo tuuri-nyaŋey kulu mo ga doon Rabbi jine farhã sabbay se,

¹³Zama a goono ga kaa, A goono ga kaa ndunnya ciito sabbay se. A ga ciiti ndunnya se da adilitaray, Ndunnya dumey mo se da nga naanayo.