Read Zarma Psalms 97 Bible Online

Psalms 97 - Zarma bible

Psalms 97

¹Rabbi no ga may, ndunnya ma farhã. Gungey margey ma te bine kaani.

²Beene hirriyaŋey da kubay go g'a windi, Adilitaray da cimi ciiti no ga ti a karga daba.

³Danji go ga koy a jine, A g'a ibarey kaŋ go g'a windi ton.

⁴A maliyaŋey go ga ndunnya kaarandi, Ndunnya go ga di, a go ga jijiri mo.

⁵Tondi kuukey go ga manne Rabbi jine sanda yu fanta cine, Ndunnya kulu Koyo jine nooya.

⁶Beeney go g'a adilitara fe, dumey kulu mo di a darza.

⁷Danay tooru ganakoy kulu haaw, Kaŋ ga ti borey kaŋ yaŋ ga fooma nda tooru. Ya araŋ malaykey kulu kaŋ gaa borey ga de, Wa sududu Rabbi se.

⁸Sihiyona go ga maa woodin, a bine go ga kaan mo. Ya Rabbi, Yahuda ize wayey go ga farhã ni ciitey sabbay se.

⁹Zama ni ya Rabbi Beeray-Beeri-Koy no ndunnya kulu boŋ. Ni beera go beene ka bisa de-koyey kulu.

¹⁰Ya araŋ kaŋ yaŋ ga ba Rabbi, kal araŋ ma konna ilaalo, Nga wo a wane hanantey fundey hallasikwa no, A g'i kaa laalakoyey kambe ra mo.

¹¹I ga annura duma adilante se, Da bine kaani mo borey kaŋ yaŋ biney ga kay se.

¹²Ya araŋ adilantey, wa te bine kaani Rabbi ra, Wa saabu a maa hanna se.