Read Zarma Proverbs 1 Bible Online

Proverbs 1 - Zarma bible

Proverbs 1

¹Israyla* bonkoono Suleymanu, Dawda ize yaasayey neeya:

²Zama i ma bay laakal nda dondonandiyaŋ gaa; I ma fahamay sanney fayanka mo.

³Zama i ma dondonandiyaŋ ta laakal goy da adilitaray da cimi ciiti da sasabandiyaŋ ra.

⁴Zama i ma borey kaŋ si caram yaŋ no azanci, I ma bayray da fayanka mo no arwasu se.

⁵Zama laakalkooni ma maa ka tonton da bayray. Fahamante mo ma to saaware hanney gaa.

⁶Zama i ma yaasay da nga feerijo bay, I ma laakalkooney sanney da ngey misey mo bay.

⁷Rabbi humburkumay ya bayray sintinay no, Amma borey kaŋ yaŋ si caram ga donda laakal da dondonandiyaŋ.

⁸Ay izo, ma ni baaba cabe ta, Ni nya lordo mo, ni ma s'a furu.

⁹Zama i ga te ni se gomni taalam ni boŋo gaa, Da hiiri mo ni jinda gaa.

¹⁰Ay izo, da zunubikooney na ni hiila-hiila, Ma si yadda.

¹¹D'i ne: «Ma kaa, iri ma koy care banda ka batandi ka wi. Iri ma gum mo borey kaŋ yaŋ sinda taali se sabaabu kulu si.

¹²Iri m'i gon da fundi, danga Alaahara cine, I afo kulu sukutum, Danga borey kaŋ yaŋ ga gunguray hala guusu ra.

¹³Iri ga arzaka darzakoy yaŋ gar, dumi-dumi, Iri g'iri windey toonandi nda nooru.

¹⁴Kala ni ma margu nda iri, Iri kulu, iri ga te nooru foolo folloŋ.»

¹⁵Ay izo, ma si margu nd'ey fondo. Ma ni ce hibandi ka kaa i laawalo gaa.

¹⁶Zama i cey ga zuru no i ma goy laalo te se, I goono ga cahã boro wiyaŋ se.

¹⁷Zama yaamo no i ma asuuta hirri naŋ kaŋ curo ga di a.

¹⁸Woodin yaŋ binde, ngey boŋ wiyaŋ se no i goono ga batandi, Ngey fundey halaciyaŋ se mo no i goono ga gumandi te.

¹⁹Yaadin no riiba binikom kulu muraadey bara nd'a, A ga nga koy fundo kom a gaa no.

²⁰Laakal goono ga ce fondey ra, A goono ga nga jinde tunandi batamey ra.

²¹A goono ga ce marga nangu beerey ra, Naŋ kaŋ borey ga furo kwaara meyey ra; Kwaara ra a goono ga nga sanney salaŋ ka ne:

²²«Araŋ kaŋ sinda carmay, Alwaati marge no araŋ ga ba carmay-jaŋay, Dondayankoyey ma maa ngey dondayaŋ kaani, Saamey mo ma wangu bayray?

²³Wa bare ay kaseetiyaŋo boŋ! A go, ay g'ay biya zumandi araŋ boŋ, Ay m'araŋ bayrandi nd'ay sanno.

²⁴Za kaŋ ay ce, araŋ wangu mo, Ay n'ay kamba salle, amma afo si no kaŋ saal a.

²⁵Amma araŋ n'ay saawarey kulu furu, Araŋ mana yadda nd'ay kaseetey baa kayna;

²⁶Kal ay mo ma haaru araŋ masiibey zaaro hane, Ay ga hahaarayaŋ te waato kaŋ humburkumay kaa araŋ gaa.

²⁷Waato kaŋ humburkumay kaa araŋ gaa danga alma haw beeri cine, Araŋ masiibey m'araŋ to danga hari haw bambata, Saaya kaŋ azaaba nda kankami du araŋ.

²⁸Saaya din i g'ay ce, amma ay si tu. I g'ay ceeci nda himma, i si du ay mo.

²⁹Zama i wangu bayray, I mana Rabbi humburkumay suuban.

³⁰I mana yadda nd'ay saawarey baa kayna, I donda ay kaseetey kulu.

³¹I binde ga ngey fundey alhakku ŋwa, I ma kungu nda ngey dabarey.

³²Zama borey kaŋ yaŋ sinda carmay banda yeyaŋo g'i wi, Saamey goray mo g'i halaci.

³³Amma boro kulu kaŋ hangan ay se ga goro baani, A ga goro nda fundi kaani, A si humburu masiiba kulu.»