Read Zarma Proverbs 10 Bible Online

Proverbs 10 - Zarma bible

Proverbs 10

¹Suleymanu yaasay fooyaŋ neeya: Ize laakalkooni ga nga baabo bine kaanandi, Amma ize kaŋ ga saamo, a ga nga nya bine tiŋandi.

²Laala arzaka sinda nafa kulu, Amma adilitaray ga boro faaba buuyaŋ gaa.

³Rabbi si naŋ adilante fundo ma maa haray bo, Amma a ga boro laalo beeja hibandi.

⁴Boro kaŋ ga goy da hawfunay ga talka, Amma himmante kambe ga arzaka margu.

⁵Bora kaŋ margu-margu kaydiya waate no ga ti ize laakalkooni. Amma boro kaŋ ga jirbi heemar waate, Ize no kaŋ ga haawi candi.

⁶Albarka go adilante boŋ, Amma toonye ga boro laalo me daabu.

⁷I ma fongu adilante gaa, woodin ya albarka no, Amma boro laalo maa ga fumbu.

⁸Bine ra laakalkooni ga lordiyaŋ ta, Amma boro kaŋ meyo gonda saamotaray ga kaŋ.

⁹Boro kaŋ ga dira nda adilitaray, Baani samay no a ga dira. Amma boro kaŋ ga nga fondey siirandi, I ga bay a gaa.

¹⁰Mo-karko ga kande bina saray, Amma boro kaŋ meyo gonda saamotaray ga kaŋ.

¹¹Adilante me ga ti fundi hari-mo, Amma toonye ga boro laalo me daabu.

¹²Konnari ga yanje fisi ka kaa taray, Amma baakasinay ga taali kulu daabu.

¹³Fayankakoy me ra i ga laakal gar, Amma boro kaŋ jaŋ fahamay, Barzu go no a banda daaro se.

¹⁴Laakalkooney ga bayray margu, Amma saamey me ga maan halaciyaŋ gaa.

¹⁵Arzakante duure ga te a se kwaara gaabikooni. Alfukaarey halaciyaŋ ga ti talkatara.

¹⁶Adilante goyo go fundi do haray. Boro laalo arzaka mo ga koy zunubi gaa.

¹⁷Boro kaŋ laakal da yaamaryaŋ, Fundi fonda ra no a go, Amma boro kaŋ na kaseetiyaŋ furu, a daray.

¹⁸Boro kaŋ na konnari tugu gonda tangari, Boro kaŋ ga kormoto ci ya saamo no.

¹⁹Sanni boobo ra i si jaŋ hattayaŋ, Amma boro kaŋ hin nga me, laakal goy no a goono ga te.

²⁰Adilante deene wo danga nzarfu suubanante no, Boro laalo bine gonda nafa kayna.

²¹Adilante me ga boro boobo kuru, Amma borey kaŋ yaŋ sinda carmay ga bu fahamay-jaŋey se.

²²Rabbi albarka ga kande arzaka, A s'a margu nda bine saray mo.

²³Saamo do, laala teeyaŋ wo danga foori hari no. Yaadin no laakal go boro kaŋ gonda fahamay se.

²⁴Haya kaŋ boro laalo ga humburu, Nga no ga kaa a gaa. Amma adilante muraadu ga feeri.

²⁵Waati kaŋ hari haw bambata ga bisa, Boro laalo ga te ka si, Amma adilante tiksa ga duumi.

²⁶Danga hari mooro hinjey gaa, Danga dullu moy ra, Yaadin no hawfuno go boro kaŋ n'a donton se.

²⁷Rabbi humburkumay ga aloomar kuukandi, Amma boro laaley jiirey ga dunguriya.

²⁸Adilante beeje ga ciya bine farhã, Amma boro laaley jine fonnayyaŋ ga halaci.

²⁹Rabbi fonda ya wongu fu gaabikooni no adilante se, Amma halaciyaŋ no goy laalo teeko se.

³⁰I si adilante ganandi hal abada, Amma boro laaley si goro laabo ra.

³¹Adilante me go ga laakal kaa taray, Amma i ga sanni-siiro-koy deene dumbu.

³²Adilante me ga bay haŋ kaŋ gonda maayaŋ kaano, Amma boro laalo me ga sanni siiro yaŋ salaŋ.