Read Zarma Proverbs 12 Bible Online

Proverbs 12 - Zarma bible

Proverbs 12

¹Boro kaŋ ga ba goojiyaŋ ya bayray baako no, Amma boro kaŋ wangu kaseetiyaŋ, alman daa no a se.

²Boro hanno ga du gaakuri Rabbi do, Amma a ga dabari-laalo-koy zeeri.

³I si boro sinji laala boŋ bo, Amma i si adilante tiksa hibandi.

⁴Wayboro bine-hanante-koy ya darza fuula no nga kurnye se, Amma haawi teeko wo ga hima biri ra fumbi.

⁵Adilantey fonguyaŋey ya cimikoyyaŋ no, Amma boro laaley saawarey ga ti gulinci.

⁶Boro laaley sanney ya gumandi no boro wiyaŋ se, Amma adilantey me g'i faaba.

⁷I ga boro laaley bare ka gum hala i ma si no, Amma adilantey dumo ga sinji.

⁸Boro ga du sifayaŋ nga laakal goyo boŋ, Amma i ga donda boro kaŋ laakal ga siiri.

⁹Boro kaŋ i man'a ye hay fo hanno no, Day a gonda bannya, A bisa boro kaŋ ga nga boŋ beerandi, A sinda baa ŋwaari mo.

¹⁰Adilante ga laakal nda nga almano fundi, Amma boro laalo suujo ya bine-biibay no.

¹¹Boro kaŋ na nga fari far ga kungu nda ŋwaari, Amma boro kaŋ na boro yaamey gana, a koy sinda boŋ.

¹²Boro laalo ga yalla nda laala hirrimi ham, Amma adilante tiksa ga nafa no.

¹³Me sanni yaamo ra hirrimi go no boro laalo se, Amma adilante ga taabi yana.

¹⁴Boro ga kungu nda gomni nga me nafayaŋo do, I ga boro bana mo nda nga kambe goyey.

¹⁵Saamo diyaŋo gaa, nga fonda ga saba no, Amma laakalkooni ga hangan saaware se.

¹⁶Saamo futa ga bangay sahãadin, Amma laakalkooni ga haawi daabu.

¹⁷Boro kaŋ na cimi ci, adilitaray no a ga bangandi, Amma tangari seedakoy, kala gulinci.

¹⁸Boro go no kaŋ ga salaŋ nda cahãyaŋ danga takuba gooruyaŋ cine, Amma laakalkooni deene ya baani no.

¹⁹Me kaŋ ga cimi ci ga tabbat hal abada, Amma deena kaŋ ga tangari te ga ban fap! folloŋ.

²⁰Gulinci go no borey kaŋ yaŋ ga ilaalo sijiri biney ra se, Amma bina farhã go no baani saawarekoy se.

²¹Masiiba si no kaŋ ga du adilantey, Amma boro laalo ga to da doori.

²²Me kaŋ ga taari ya fanta hari no Rabbi se, Amma bora kaŋ ga goy da cimi ya a farhã hari no.

²³Laakalkooni ga nga bayra tugu, Amma saamey biney ga saamotaray fe.

²⁴Kookarantey kambey ga te mayray, Amma i ga tilas goy dake hawfuney boŋ.

²⁵Boro bine ra fitina ga naŋ a ma sumbal, Amma gomni sanni ga bina kaanandi.

²⁶Adilante ga ti jina candiko nga gorokasin se, Amma boro laaley fondey g'i darandi.

²⁷Hawfuno si nga koli ham fooru bo, Amma himmante duure ya darza hari no.

²⁸Adilitaray fonda ra fundi go no, A fondayzey ra mo buuyaŋ si no.