Read Zarma Proverbs 13 Bible Online

Proverbs 13 - Zarma bible

Proverbs 13

¹Ize laakalkooni ga nga baaba dondonandiyaŋ ta, Amma dondako si maa kaseetiyaŋ.

²Boro ga albarka ŋwa nga me nafa do, Amma amaana ŋwaako fundo ga toonye ŋwa.

³Boro kaŋ ga haggoy nda nga me ga nga boŋ hallasi, Amma boro kaŋ na nga me taŋ, Halaciyaŋ ga ti a baa.

⁴Hawfuno go ga bini, amma a si du hay kulu, Day kookarante fundo ga zaada.

⁵Adilante ga konna taari, Amma boro laalo ya fanta hari no, A ga haawi hari te mo.

⁶Adilitaray ga boro kaŋ fondo ga kay batu, Amma laala ga zunubikooni bare ka gum.

⁷Boro go no kaŋ ga nga boŋ himandi arzakante, A go mo, a sinda hay kulu. Boro go no mo kaŋ ga nga boŋ himandi talka, A gonda duure boobo mo.

⁸Boro fundo fansa ya a duura no, Amma alfukaaru si maa kaseetiyaŋ.

⁹Adilante kaaro ga farhandi, Amma boro laalo fitilla ga bu.

¹⁰Boŋbeeray fonda ra hay kulu si no kala yanje, Amma laakal go no borey kaŋ yaŋ ga saaware hanno ta do.

¹¹Arzaka kaŋ i du goy yaamo do ga ye ka ciya ikayna, Amma boro kaŋ ga margu-margu nga kambe goyo do ga du tontoni.

¹²Muraadu kaŋ mongo ka feeri ga naŋ bine ma dooru, Amma d'i du ngey bine ibaay hari, fundi tuuri no.

¹³Boro kaŋ donda Sanno ga halaciyaŋ candi ka kande nga boŋ gaa, Amma boro kaŋ humburu lordo ga du nga alhakku.

¹⁴Laakalkooni dondonandiyaŋ ya fundi hari-mo no, Kaŋ ga boro fay da buuyaŋ kumsay.

¹⁵Fahamay hanno ga gaakuri candi, Amma naanay feeriko fonda ga sandi.

¹⁶Laakalkooni kulu ga nga goyo te bayray boŋ, Amma saamo ga nga saamotara bangandi.

¹⁷Diya laalo ga kaŋ bone ra, Amma diya naanaykoy ya baani no.

¹⁸Talkataray da haawi go boro kaŋ wangu goojiyaŋ se, Amma boro kaŋ haggoy da kaseetiyaŋ ga du beeray.

¹⁹Muraadu kaŋ feeri ga kaan fundi se, Amma fanta hari no saamey se i ma fay da laala teeyaŋ.

²⁰Ma dira laakalkooney banda, ni ga te laakal mo, Amma saamey hangasin ga di bone.

²¹Bone ga zunubikooni ce kondo ŋwa, Amma i ga gomni bana adilante se.

²²Boro hanno ga tubu naŋ hala nga haamey se, Amma i ga zunubikooni duure jisi adilantey se.

²³Talkey farey ra, ŋwaari boobo go no, Amma cimi ciiti jaŋay g'a haabu ka ku.

²⁴Boro kaŋ mana nga izo barzu goono ga wangu nga izo no, Amma boro kaŋ ga ba r'a g'a gooji nda anniya.

²⁵Adilante ga ŋwa hal a fundo ma kungu, Amma boro laalo gunda ga jaŋ.