Read Zarma Proverbs 14 Bible Online

Proverbs 14 - Zarma bible

Proverbs 14

¹Wayboro laakalkooni ga nga fuwo cina, Amma wayboro saamo ga nga wano zeeri nda nga kambey.

²Boro kaŋ ga dira nga adilitaray toonante ra ga humburu Rabbi, Amma boro kaŋ ga nga fonda siirandi ga dond'a no.

³Saamo me ra gonda sar'ize a boŋbeera sabbay se, Amma laakalkooney deeney g'i hallasi.

⁴Nangu kaŋ sinda haw, i ŋwaari garba ga hanan, Amma yeeji gaabi do i ga te tontoni boobo.

⁵Seeda daahirante si tangari, Amma tangari seedakoy, kala tangari kaŋ a ga ci.

⁶Dondayankoy ga laakal ceeci, a si du a, Amma bayray wo, hari doogono no fahamante se.

⁷Ma fun boro kaŋ si caram do, Zama ni si bayray meyo gar a do.

⁸Haggoyyankoy laakalo ga ti a ma faham da nga fonda, Amma saamey saamotara ya gulinci no.

⁹Saamey ga taali himandi hahaarayaŋ hari, Amma boro toonante do gomni miila go no.

¹⁰Boro bine ga nga boŋ azaaba bay, A farhã mo, boro fo si maa r'a.

¹¹I ga boro laaley windey bare ka gum, Amma adilantey bukkey ga te albarka.

¹²Fondo go no kaŋ go kayante boro diyaŋo gaa, Amma a bananta ya buuyaŋ fondo no.

¹³Baa haari teeyaŋ si ganji bine gonda hasaraw. Haari wo, a ga hin ka kokor da bine tiŋay.

¹⁴Boro kaŋ ye da banda nga bina ra ga kungu nda nga fonda, Boro hanno mo nda haŋ kaŋ go a wano ra.

¹⁵Boro kaŋ sinda carmay ga sanni kulu cimandi, Amma laakalkooni ga haggoy nda nga te-goyey hala a ma boori.

¹⁶Laakalkooni ga humburu, a ga fay da laala teeyaŋ mo, Amma saamo ga boŋ jare ka ne nga na hay kulu tabbatandi.

¹⁷Bine-waaso-koy ga saamotaray goy te. Boro kaŋ ga dabari laalo kaa taray mo, i ga konn'a.

¹⁸Boro kaŋ sinda carmay ga saamotaray tubu, Amma bayray ga te laakalkooni se boŋ gaa taalam.

¹⁹Boro laaley ga aniya ka sumbal boro hanney jine, Zambantey mo yaadin cine no adilantey fu meyey gaa.

²⁰Talka ya wangay hari no baa nga gorokasin se, Amma arzakante gonda baako boobo.

²¹Boro kaŋ donda nga gorokasin, Zunubi no a goono ga te, Amma boro kaŋ ga bakar talkey se ya bine kaani koy no.

²²Goy laalo soolakoyey, manti i goono ga fondo taŋ no? Amma suuji nda cimi ga ciya gomni te-koy baa.

²³Goy kulu ra gonda riiba, Amma me sanni hinne si kande kala talkataray.

²⁴Laakalkooney boŋ taalam ga ti i arzaka, Amma saamey saamotara ya saamotaray hinne no.

²⁵Cimi seeda ciiko ga fundiyaŋ faaba, Amma tangari ciiko ga hiila candi.

²⁶Rabbi humburkumay ra naanay gaabikooni go no. Bora din izey mo ga du tuguyaŋ do.

²⁷Rabbi humburkumay ya fundi hari zuru mo yaŋ no, Kaŋ ga boro fay da buuyaŋ hirrimey.

²⁸Bonkooni darza ga ti a jama baayaŋo, Amma boro jaŋay ga ti koy kayney halaciyaŋ.

²⁹Boro kaŋ ga suuru nda bine tunyaŋ gonda fahamay hanno, Amma boro bine-waaso-koy ga saamotaray beerandi.

³⁰Laakal kaanay ya fundi no gaaham se, Amma canse ya biri fumbi no.

³¹Boro kaŋ na alfukaaru toonye na nga Takakwa foy, Amma boro kaŋ na suuji cabe laamikoyey se goono g'a beerandi no.

³²I ga boro laalo zeeri nga goy laala ra, Amma adilante gonda tuguyaŋ do nga buuyaŋ hane.

³³Laakal go ga nga goray te fahamante bina ra, Amma saamey game ra, a ga bangay.

³⁴Adilitaray ga kunda beerandi, Amma zunubi ya haawi hari no dumi kulu se.

³⁵Bonkooni gaakuri ga koy goy-ize kaŋ ga goy da laakal do haray, Amma a bine tunyaŋ ga zumbu boro kaŋ ga haawi goy te boŋ.