Read Zarma Proverbs 15 Bible Online

Proverbs 15 - Zarma bible

Proverbs 15

¹Sanni yeyaŋ baano ga futay bare, Amma sanni waaso ga futay tunandi.

²Laakalkooni deena ga bayray hanno ci, Amma saamey me ga saamotaray gusam.

³Rabbi moy go nangu kulu, I ga ihanney nda ilaaley kulu guna.

⁴Deene baanikom ya fundi tuuri no, Amma wo kaŋ siiri ya bine funyaŋ hari no.

⁵Saamo ga donda nga baabo goojiyaŋ, Amma boro kaŋ na mo ye kaseetiyaŋ gaa ga du laakal.

⁶Adilante windi ra, arzaka boobo go no, Amma boro laalo duure ra, kala laakal tunay.

⁷Laakalkooney meyey ga bayray say-say, Amma saamey biney wo manti yaadin no.

⁸Boro laalo sargay ya fanta hari no Rabbi se, Amma toonante adduwa ya a farhã hari no.

⁹Boro laalo fondo wo, fanta hari no Rabbi se, Amma boro kaŋ ga adilitaray gana, a ga ba r'a.

¹⁰Boro kaŋ na fondo taŋ, goojiyaŋ dungo ga kaa a gaa, Boro kaŋ wangu kaseetiyaŋ mo ga bu.

¹¹Alaahara nda Halaciyaŋ go Rabbi jine, Sanku fa binde Adam-izey biney.

¹²Dondako si ba boro kaŋ ga deeni nga gaa. A si koy laakalkooney do mo.

¹³Bine kaŋ ga maa kaani ga moyduma farhandi, Amma bine saray do no, a bina ga fun.

¹⁴Boro kaŋ gonda laakal bina ga bayray ceeci, Amma saamey me ŋwaaro ya saamotaray no.

¹⁵Borey kaŋ yaŋ go taabi ra, i jirbey kulu gonda doori, Amma bine kaanikoy gonda batu duumi.

¹⁶Dambe kayna, nga nda Rabbi humburkumay, A ga bisa arzaka boobo kaŋ taabi go a banda.

¹⁷Dambe i ma kassi ŋwa naŋ kaŋ baakasinay go, D'i ma haw kaŋ i kuru ŋwa nda konnari a banda.

¹⁸Boro kaŋ bine tunyaŋ ga baa ga kusuuma tunandi. Amma boro kaŋ ga suuru bine tunyaŋ se ga yanje kanandi.

¹⁹Hawfuno fonda ga hima nda karji kosaray. Amma adilante fonda ga te dabe fondo.

²⁰Ize laakalkooni ga nga baaba bine kaanandi, Amma saamo ga donda nga nya.

²¹Saamotaray ya farhã hari no boro kaŋ jaŋ laakal se. Amma boro fahamante ga nga dirawey sasabandi no.

²²Naŋ kaŋ sinda saaware, miile-miiley ga feeri, Amma saawarekoy jama ra i ga tabbat no.

²³Boro gonda farhã nga tuyaŋey ra, Sanni kaŋ ga hagu nga alwaati ra mo, Man a booriyaŋ misa!

²⁴Laakalkooni se fundi fonda ga gana beene haray, Zama a ma fay da Alaahara ganda.

²⁵Rabbi ga boŋbeeraykoy windi dagu, Amma a ga wayboro kaŋ kurnye bu hirro tabbatandi.

²⁶Boro laaley dabarey ya fanta hari no Rabbi se, Amma sanni kaaney ga hanan.

²⁷Riiba binikom koy ga nga windo taabandi, Amma boro kaŋ wangu ka me-daabu ta ga funa.

²⁸Adilante bine ga lasaabu nda haŋ kaŋ nga ga tu, Amma boro laalo me ga hari laaley bambari.

²⁹Rabbi ga mooru boro laaley, Amma a ga maa adilante adduwa.

³⁰Moyduma farhante ga naŋ bine ma maa kaani, Baaru hanno mo ga naŋ biri ma te londi.

³¹Hanga kaŋ ga hangan fundi kaseetiyaŋ se ga goro laakalkooney do.

³²Boro kaŋ wangu dondonandiyaŋ, Nga bumbo fundo no a ga donda, Amma boro kaŋ hangan kaseetiyaŋ se ga du fahamay.

³³Rabbi humburkumay ya laakal dondonandiyaŋ no, Beeray mo ga lalabay gana.