Read Zarma Proverbs 16 Bible Online

Proverbs 16 - Zarma bible

Proverbs 16

¹Bine saawarey ya boro wane yaŋ no, Amma me tuyaŋo, Rabbi do no a ga fun.

²Boro fondey kulu gonda hananyaŋ nga bumbo diyaŋ ra, Amma Rabbi ga biyey neesi.

³Ma ni goyey talfi Rabbi gaa, Ni miile-miiley mo ga tabbat.

⁴Rabbi na hay kulu taka nga bumbo miila se, Oho, baa boro laaley masiiba zaaro se.

⁵Bine ra boŋ beeraykoy kulu ya fanta hari no Rabbi se. Baa i na kambe daŋ care kambe ra, a si ciiti yana bo.

⁶Suuji nda cimi do no i ga zunubi sasabandiyaŋ te. Rabbi humburkumay do mo borey ga fay da laala.

⁷Da boro fonda ga kaan Rabbi se, A ga naŋ baa a ibarey ma baani goray te d'a.

⁸Arzaka kayna nda adilitaray a banda bisa duure boobo nda cimi-jaŋay a banda.

⁹Boro bine g'a fonda sijiri, Amma Rabbi no g'a cabe taamuyaŋ nangu.

¹⁰Irikoy ganayaŋ ciiti dumbuyaŋ go bonkooni me ra, A meyo si hatta mo ciiti gaa.

¹¹Zaka nda neesiyaŋ hari cimikoyey ya Rabbi wane yaŋ no. Foola ra tiŋay tondey kulu mo a goy no.

¹²Fanta hari no koyey se i ma goy laalo te, Zama karga wo, adilitaray boŋ no a ga sinji.

¹³Me cimikoy ya farhã hari no bonkooney se, I ga ba boro kaŋ ga cimi ci.

¹⁴Bonkooni bine tunyaŋ ga hima buuyaŋ diya, Amma boro kaŋ gonda laakal g'a futa kanandi.

¹⁵Bonkooni moyduma hananyaŋ ra, fundi go no, A gomno mo, danga kokor banda buru kaŋ gonda hari no.

¹⁶Laakal duure bisa wura gumo-gumo. Oho, fahamay duure, boro m'a suuban ka bisa nzarfu.

¹⁷Adilante fondo ga ti i ma fay da laala no. Boro kaŋ na nga fonda haggoy goono ga nga fundo hallasi.

¹⁸Boŋbeeray banda, kala halaciyaŋ, Kaŋyaŋ mo goono ga boŋ jareyaŋ gana.

¹⁹Boro ma goro nda lalabu biya talkey banda ga bisa ni ma toonye arzaka fay da boŋbeeraykoy.

²⁰Boro kaŋ na laakal ye sanni gaa ga du booriyaŋ. Boro kaŋ ga de Rabbi gaa mo ga du a albarka.

²¹Bine ra laakalkooni, i ga ne a te boŋ, Sanni kaano mo ga bayray tonton.

²²Fahamay ya fundi hari-mo no boro kaŋ gond'a se, Amma saamey goojiyaŋ ga ti saamotaray.

²³Laakalkooni bine g'a meyo dondonandi, A ga bayray tonton a me sanney se mo.

²⁴Sanney kaŋ ga kaan ga hima yu fanta, I ga kaani no fundi se, baani mo biriyey se.

²⁵Fondo go no kaŋ go kayante boro diyaŋ gaa, Amma a bananta buuyaŋ fondo no.

²⁶Goy-teeri hara se no a ga goy, Zama a gunda no g'a tuti.

²⁷Boro yaamo ga zamba miila, A meyo ra mo danga danji kaŋ ga ton no.

²⁸Boro kaŋ me ga kasu ga kusuuma say-say. Kormotante mo ga coroyaŋ kaa care.

²⁹Toonyante ga nga gorokasin fafagu, A ma naŋ a ma fondo kaŋ si boori gana.

³⁰Boro kaŋ ga nga moy daabu, A g'a te no zama a ma fongu hattayaŋ muraadu. Boro kaŋ ga nga meyo kunsum mo ya laala candiko no.

³¹Hamni kwaaray ya darza boŋtobay no, D'i n'a gar adilitaray fonda ra.

³²Boro kaŋ ga suuru nda bine tunay ga bisa hinkoy. Boro kaŋ ga nga biya may ga bisa boro kaŋ na kwaara ŋwa.

³³I ga kurne catu ce boŋ, Amma a ciito kulu Rabbi do no a go.