Read Zarma Proverbs 18 Bible Online

Proverbs 18 - Zarma bible

Proverbs 18

¹Boro kaŋ na nga boŋ fay waani, Nga boŋ muraadu no a goono ga ceeci. A ga laakal hanante kulu kakaw.

²Saamo sinda farhã kulu fahamay ra, Kala day a bina ma nga boŋ kaa taray.

³Saaya kaŋ boro laalo kaa, Kala donda-caray mo ma kaa, Kayna banda mo kala foyray.

⁴Boro me sanney go danga hari kaŋ ga guusu, Koyne, laakal hari-mo go danga gooru kaŋ ga zuru.

⁵A si boori i ma boro laalo beerandi, Hal i ma adilante ganji cimi ciiti.

⁶Saamo deene ga furo kakaw ra, A meyo mo ga karyaŋ ce a ma kaa.

⁷Saamo meyo ya a halaciko no, A deena mo ga ti a fundo se kumsay.

⁸Boro kaŋ ga ciinay, a sanno ga hima laam'izey no, I ga furo hala bine lokotey ra.

⁹Boro kaŋ ga hawfun nga goy ra ga te halaciko se nya-ize.

¹⁰Rabbi maa ya wongu fu gaabikooni no, Adilante ga zuru ka furo a ra ka goro baani.

¹¹Arzakante arzaka a kwaara gaabikooni no, Danga cinari kuuku mo no a diyaŋo gaa.

¹²Za halaciyaŋ mana kaa boro ga te boŋbeeray, Beeray mo goono ga lalabu ce gana.

¹³Boro kaŋ na sanni ye za a mana maa, Saamotaray da haawi no a gaa.

¹⁴Boro biya ga suuru nda nga dooro, Amma bine sunnay, may no ga hin a suuru?

¹⁵Fayankakoy bine ga du bayray, Laakalkooni hanga mo ga bayray ceeci.

¹⁶Boro nooyaŋo ga nangoray soola a se, A ga kond'a mo boro beerey jine.

¹⁷Boro kaŋ jin ka kande nga sanno, A cimo no i ga di. Amma a gorokasin ga kaa k'a gosi.

¹⁸Goŋ ga kakaw feeri, A ga fay hinkoy hinka game ra mo.

¹⁹Nya-izetaray kaŋ sara ga bisa kwaara gaabikooni sasabandiyaŋ sanday. Kakaw sanni mo ga hima sanda cinari me daabirji karangaley.

²⁰Boro gunde ga kungu nd'a me sanney, A ga kungu nd'a me-kuurey nafa.

²¹Buuyaŋ nda fundi go deene hina ra, Boro kaŋ ga ba hina din mo ga kungu nd'a nafa.

²²Boro kaŋ du wande, hari hanno no a du. A du gomni Rabbi do mo.

²³Alfukaaru ga ŋwaarayyaŋ te, Amma arzakante ga tu da sanni kaso.

²⁴Coro boobo ga kande hasaraw boobo, Amma baako go no kaŋ ga ba ni ganda ka bisa nya-ize.