Read Zarma Proverbs 19 Bible Online

Proverbs 19 - Zarma bible

Proverbs 19

¹Talka kaŋ goono ga dira nga cimi toonanta ra ga bisa me laalokoy kaŋ a go mo, saamo no.

²Koyne, a mana boori fundi se a ma goro bayray si. Woodin banda, boro kaŋ ga cahã nda nga ce, Hartayaŋ no a ga te.

³Adam-ize saamotara no g'a fundo halaci a se, A bina mo goono ga guutu Rabbi gaa.

⁴Arzaka ga kande hangasin boobo, Amma talka wo, fayante no a go baa nga gorokasin se.

⁵Tangari seedakoy si ciiti yana, Tangari ciiko mo si du faaba.

⁶Boro boobo ga gomni ŋwaaray nooyaŋ-boobo-koyo gaa, Boro kulu mo nooko coro no.

⁷Talka nya-izey kulu ga wang'a, Sanku fa binde a corey ga mooru a gaa. A g'i gana nda sanniyaŋ, amma i ban ka dira.

⁸Boro kaŋ du laakal ga ba nga fundo, Boro kaŋ na fahamay haggoy mo ga gomni gar.

⁹Tangari seedakoy si ciiti yana bo, Tangari ciiko mo ga halaci no.

¹⁰Kaani goray mana hagu saamo se, Sanku fa binde bannya ma du koytaray dabarikooniyaŋ boŋ.

¹¹Boro laakalo ga naŋ a ma suuru nda bine tunay, Darza mo no a se a ma taali muray.

¹²Bonkooni futay ga hima muusu beeri daŋ futo dunduyaŋ, Amma a gomno ga hima subu tayo boŋ harandaŋ.

¹³Ize kaŋ ga saamu wo masiiba no a baabo se, Wande sanni-boobo-koy mo ga hima danga mimisi duumi.

¹⁴Windi nda arzaka ya tubu hari no za baabey do, Amma wande laakalkooni, Rabbi do no a ga fun.

¹⁵Hawfunay ga konda boro hala jirbi tiŋo ra, Dirgaykom mo ga maa haray.

¹⁶Boro kaŋ ga haggoy da lordi, Nga fundo no a goono ga haggoy, Amma boro kaŋ na saalay kaa nga fonda gaa ga bu.

¹⁷Boro kaŋ ga bakar alfukaarey se goono ga garaw daŋ Rabbi gaa, A g'a bana a se mo da nga gomno.

¹⁸Ma ni izo gooji, za kaŋ beeje go no, Ma si ni bine sinji a halaciyaŋo gaa.

¹⁹Boro kaŋ bine tunyaŋ ga baa ga du a alhakko, Zama baa ni n'a kaa kambe tilas kala ni ma ye k'a te koyne.

²⁰Ma maa saaware, ma dondonandiyaŋ ta, Zama ni ma te laakal hala ni jirbey bananta ra.

²¹Dabari boobo no boro bina ra, Amma Rabbi saawara, nga no ga tabbat.

²²Boro gomni hina me no i ga ba r'a, Talka mo bisa tangarikom.

²³Rabbi humburkumay wo, Fundi do haray no a ga koy. Boro kaŋ gond'a ga jirbi wasa yaŋ ra, Masiiba mo si kaa a gaa.

²⁴Hawfuno ga nga kambe sufu hawru ra, Amma a si kond'a nga meyo do.

²⁵Ma dondako kar, Boro kaŋ jaŋ fahamay mo ga laakal dondon. Ma deeni fahamante gaa, Nga mo ga faham da bayray.

²⁶Boro kaŋ na nga baabo toonye ka nga nya gaaray wo ize kaŋ ga kande haawi no, Kayna candiko mo no.

²⁷Ay izo, da ni fay da dondonandiyaŋ hanganyaŋ, Ni ga kamba ka fay da bayray sanney.

²⁸Seeda yaamo ga fooru nda cimi ciiti, Boro laaley me mo ga kungu nda laala.

²⁹I ga ciitiyaŋ soola dondako se, Barzuyaŋ mo go no saamey banda daarey se.