Read Zarma Proverbs 2 Bible Online

Proverbs 2 - Zarma bible

Proverbs 2

¹Ay izo, da ni n'ay sanney ta, Ni n'ay lordey gaay ni do,

²Hala mo ni na ni hanga jeeri laakal gaa, Ka ni bina ye fahamay gaa,

³Oho, da ni na fayanka ce, Ka ni jinda tunandi fahamay se,

⁴Da ni n'a ceeci danga nzarfu cine, K'a gana danga mate kaŋ i ga arzaka tugante ceeci:

⁵Saaya din no ni ga faham da Rabbi humburkumay, Ka Irikoy bayray gar.

⁶Zama Rabbi ga laakal no, A meyo ra no bayray da fahamay goono ga fun.

⁷A ga laakal hanno jisi adilantey se, Nga ya koray no ngey kaŋ yaŋ ga dira cimi ganayaŋ ra se.

⁸A ga woodin te zama nga ma cimi ciiti fondayzey haggoy, A ma hanantey fondey hallasi.

⁹Saaya din mo ni ga faham nda adilitaray da cimi ciiti, da sasabandiyaŋ mo, Oho, da fondo kaŋ ga boori kulu no.

¹⁰Zama laakal ga furo ni bina ra, Bayray mo ga kaan ni fundo se.

¹¹Laakal ga soobay ka ni batu, Fahamay mo ga ni haggoy.

¹²Zama i ma ni faaba boro laalo fonda gaa. Borey kaŋ i sanney ga siiri, I ga ni faaba i gaa.

¹³Ngey kaŋ ga adilitaray fonda taŋ zama ngey ma dira kubay fondey ra se.

¹⁴Ngey din ga farhã da laala goy, I ma maa laala hattayaŋ kaani,

¹⁵Borey kaŋ yaŋ ga siiri ngey fondey ra, Kaŋ yaŋ ga hatta ngey laawaley ra no.

¹⁶Laakal ga ni faaba waykuuru kambe gaa, Danga wayboro yaw me-kaani-koy,

¹⁷Kaŋ ga nga zankataray gorokasino furu, A ga dinya nda nga Irikoyo alkawlo mo.

¹⁸Zama a kwaara fonda ga siiri ka koy buuyaŋ do, A laawaley mo ga koy buukoy do haray.

¹⁹Borey kaŋ yaŋ ga koy a do, I ra sinda boro kaŋ ga ye ka kaa koyne, I si to mo fundi laawaley gaa.

²⁰Ma laakal ceeci mo zama ni ma soobay ka dira boro hanney fondey ra, Ni ma adilitaray laawaley gana.

²¹Zama adilantey ga goro laabo ra, Toonantey mo no ga cindi a ra.

²²Amma i ga boro laaley waasu ka kaa laabo ra, I ga amaana ŋwaakoy dagu ka kaa a ra mo.