Read Zarma Proverbs 20 Bible Online

Proverbs 20 - Zarma bible

Proverbs 20

¹Duvan* ya hahaarayko no, Baji mo kosongukoy no. Boro kulu kaŋ bugu nd'ey sinda laakal.

²Bonkooni humburandiyaŋ wo, Danga muusu beeri daŋ futo dunduyaŋ no, Boro kaŋ n'a futa zukku na nga fundo daŋ kambe.

³Beeray no boro se a ma mooru kuta gaa, Amma saamo kulu ga ba yanje.

⁴Hawfuno wangu ka far kaydiya ra, Woodin se no a ga ŋwaaray heemar, a si du hay kulu mo.

⁵Boro bine ra saaware ga hima hari guuso, Amma boro kaŋ gonda fahamay g'a candi.

⁶Boro boobo ga ngey gomney fe, Amma cimi boro, may no ga hin ka du a?

⁷Boro adilante kaŋ ga dira nga cimi tooyaŋo ra, A banda a izey mo ga ciya albarkanteyaŋ.

⁸Bonkooni kaŋ goono ga goro ciiti karga boŋ ga laala kulu say nda nga moy.

⁹May no ka bara nda hina a ma ne: «Ay n'ay bina hanandi, Ay ya hanante no ay zunubey gaa?»

¹⁰Neesiji waani-waani, da zaka waani-waani, I boro hinka kulu fanta hari yaŋ no Rabbi se.

¹¹Baa zanka, i g'a bay nga te-goyo do, Hal a goyo hanante no, wala haŋ kaŋ ga saba no.

¹²Hanga kaŋ ga maa, da mo kaŋ ga di, Rabbi no k'i boro hinka kulu te.

¹³Ma si ba jirbi, zama ni ma si talka. Ma ni moy hay, ni ga kungu nda ŋwaari mo.

¹⁴Dayko ga ne: «Manti hari hanno no, Manti hari hanno no,» Amma d'a koy, kala fooma kaŋ a ga te.

¹⁵Wura nda tondi hiir'ize caadante yaŋ go no, Amma meyo kaŋ ga waani, Danga jinay hanno cine no.

¹⁶Boro kaŋ na yaw yadda sambu, m'a kwaayo ta, Boro kaŋ na yawey yaddandi mo, ma tolme ta a gaa.

¹⁷Tangari ŋwaari ga kaan boro se, Amma kokor banda a meyo ga to da tond'izeyaŋ.

¹⁸Bine sijiriyaŋ kulu, saaware boŋ no a ga tabbat. Ni ma wongu te da laakal saaware mo.

¹⁹Mimandakom ga gundey bangandi, Woodin se ma si hangasinay da me-boobo-koy.

²⁰Boro kaŋ na nga baaba wala nga nya laali, I g'a fitilla wi kubay bi tik ra.

²¹A ga te boro ma du tubu nda cahãyaŋ sintina gaa, Amma a bananta, a si goro nda albarka.

²²Ma si ne: «Ay ga laala bana.» Ma hangan Rabbi se, nga mo ga ni faaba.

²³Neesiji waani-waani ya fanta hari no Rabbi se, Gulinci kilo mo si boori.

²⁴Boro ce daarey, Rabbi do no i go, Mate binde no boro ga te ka nga fonda fayanka?

²⁵Hirrimi no boro se a ma salaŋ da cahãyaŋ ka ne: «Ay n'a fay waani.» Sarti sambuyaŋo banda, gaa a ma sanno neesi.

²⁶Bonkooni kaŋ gonda laakal ga boro laaley teeni, A ma kande safayaŋ humburu i boŋ.

²⁷Boro biya ya Rabbi fitilla no, A ga a ra haray lokotey kulu bangandi.

²⁸Suuji nda naanay ga bonkoono hallasi, A karga mo ga sinji suuji boŋ.

²⁹Arwasey fooma hari wo, i gaabo no, Dottijey darza mo, i hamni kwaara no.

³⁰Barzu meyey ga laala hanse, Karyaŋ mo ga to hala gunde ra.