Read Zarma Proverbs 21 Bible Online

Proverbs 21 - Zarma bible

Proverbs 21

¹Bonkoono bine go Rabbi kambe ra Danga hari zuray cine, A g'a bare nangu kulu kaŋ a miila.

²Boro fondo ga saba no a diyaŋ gaa, Amma Rabbi no ga biney neesi.

³Rabbi do, adilitaray da cimi ciiti bisa sargay teeyaŋ.

⁴Boŋ jareyaŋ da bina ra boŋbeeray, Kaŋ ga ti boro laalo fitilla, ya zunubi no.

⁵Himmante miila, yulwa hinne gaa no a ga koy, Amma cahãkom kulu, jaŋay do haray no a ga koy.

⁶Arzaka duure deene tangari do, Dullu no kaŋ i ga tuti nda waasi, I ceecikoy kulu mo, buuyaŋ no i goono ga ceeci.

⁷Boro laaley toonye goy g'i ŋwa, Zama i wangu ka cimi ciiti te.

⁸Boro kaŋ gonda taali ga jare, A fonda ga siiri no gumo, Amma hanante ciine ra, a goyo ga kay hal a ma boori.

⁹Boro ma goro lokoto ra jidan bisa boŋ ga bisa boro ma goro windi tafo ra wayboro sanni-boobo-koy banda.

¹⁰Boro laalo fundo ga yalla-yalla nda laala, A diyaŋ gaa a gorokasin si du gaakuri.

¹¹D'i na dondako gooji, I ga ye ka kande boro kaŋ sinda carmay laakal do. D'i na laakalkooni mo dondonandi, A ga bayray ta.

¹²Adilante ga laakal da boro laaley windi, A ga di kaŋ Rabbi go ga boro laaley bare ka gum hal i ma halaci.

¹³Boro kaŋ na nga hanga daabu talka hẽeni se, Nga mo ga aniya ka hẽ, i si maa r'a mo.

¹⁴Nooyaŋ tugante ga futay kanandi, Me-daabu ganda ra mo ga dukuri kanandi.

¹⁵Farhã hari no adilante se a ma cimi ciiti te, Amma halaciyaŋ no goy laalo te-koy se.

¹⁶Boro kaŋ kamba fahamay fondo gaa ga du nangu buukoy jama ra.

¹⁷Watay baako ga talka, Duvan* da ji baako mo si ciya arzakante.

¹⁸Laalakoy ya fansa hari no adilante se, Amaana ŋwaako mo banandi no boro hanney se.

¹⁹Boro ma goro saaji fimbi ra ga bisa boro ma goro nda wayboro kakawko, Kaŋ ga guutu mo.

²⁰Arzaka darzante da ji go no laakalkoyey nangoray ra, Amma boro kaŋ si caram ga arzaka gon.

²¹Boro kaŋ na adilitaray da suuji gana, Fundi nda adilitaray da beeray no a ga du.

²²Boro kaŋ gonda laakal ga hinkoyey kwaara cinaro kaaru, K'i gaabi deyaŋ haro zeeri.

²³Boro kaŋ na nga meyo da nga deena haggoy ga nga fundo hallasi taabi gaa.

²⁴Boro kaŋ gonda boŋbeeray da fundi beeray, A maa ga ti dondako. Niine jareyaŋ futo no a ga goy d'a.

²⁵Hawfuno ibaayo no g'a wi, Zama a kambey wangu goy.

²⁶A ga bini, a goono ga canse zaari me-a-me, Amma adilante wo ga no, a si boro ganji.

²⁷Boro laalo sargayey ya fanta hariyaŋ no, Sanku fa saaya kaŋ a kand'ey da miila laalo.

²⁸Tangari seedakoy ga halaci, Amma boro kaŋ ga maa ka gana, A ga hin ka salaŋ waati kulu.

²⁹Boro laalo ga mo-koogay cabe, Amma adilante ga nga fonda tabbatandi.

³⁰Laakal, wala fahamay, wala saaware si no kaŋ ga gaaba nda Rabbi.

³¹I ga bari soola wongu hane se, Amma zaama teeyaŋo, Rabbi do no a ga fun.