Read Zarma Proverbs 22 Bible Online

Proverbs 22 - Zarma bible

Proverbs 22

¹Maa hanno ya suubanyaŋ hari no ka bisa duure boobo, Gomni mo bisa wura nda nzarfu.

²Arzakante nda talka ga care kubay, Rabbi no k'i kulu te.

³Boro kaŋ gonda laakal ga masiiba fonnay, a ma tugu, Amma saamo ga bisa ka koy ka taabi haŋ.

⁴Lalabu nda Rabbi humburkumay, I alhakko ya arzaka nda beeray da fundi no.

⁵Karji nda hirrimi go no siirante fondo boŋ, Boro kaŋ na nga fundo haggoy ga mooru a gaa.

⁶Ma zanka biiri fondo kaŋ a ga gana ra, Baa waati kaŋ a zeen a s'a taŋ mo.

⁷Duurekoy ga koytaray ŋwa talka boŋ, Garaw ŋwaako mo bannya no garaw danko se.

⁸Boro kaŋ na laala duma ga mursay wi, A futa goobo mo ga gaze.

⁹Boro kaŋ gonda gomni miila ga du albarka, Zama nga ŋwaaro ra no a ga kaa ka no alfukaarey se.

¹⁰Ma dondako gaaray, kuta mo ga fun, Oho, yanje nda kayna mo ga ban.

¹¹Boro kaŋ ga ba bine hananyaŋ, A me sanni gaakuro sabbay se bonkooni ga te a se coro.

¹²Rabbi moy ga bayraykoy haggoy, Amma a ga boro kaŋ ga amaana ŋwa sanni zeeri.

¹³Hawfuno ga ne: «Muusu beeri go no taray, I g'ay wi fondey ra.»

¹⁴Waykuuru me ya guusu no kaŋ ga ku, Boro kaŋ Rabbi ga fanta no ga kaŋ a ra.

¹⁵Saamotaray goono ga kunsum zanka bine ra, Amma goojiyaŋ goobu no g'a gaaray a se nangu mooro.

¹⁶Boro kaŋ na alfukaaru toonye zama nga ma riiba ŋwa se, Da boro kaŋ na arzakante no, Jaŋay ra no i ga kokor.

¹⁷Ma ni hanga jeeri ka maa sanney kaŋ gonda laakal, Ma ni laakal ye mo ay bayra gaa.

¹⁸Zama hari kaano no da ni n'i haggoy ni bina ra, D'i kulu goro ni meyo ra care banda.

¹⁹Zama ni deyaŋo ma goro Rabbi do, Woodin se no ay na ni bayrandi nd'ey hunkuna, Oho, hala nin bumbo.

²⁰Manti ay hantum ni se harey kaŋ ga boori ka bisa, Saawarey waney nda bayray waney,

²¹Zama ay ma ni bayrandi nda cimi sanni tabbatantey, Hala ni ma du ka cimi sanney ye borey kaŋ na ni donton se?

²²Ma si alfukaaru kom zama nga ya talka no, Ma si taabante mo kankam faada meyo gaa.

²³Zama Rabbi ga faasa i se, A ga borey kaŋ g'i kom yaŋ din mo fundey kom.

²⁴Ma si corotaray te da boro kaŋ bine ga waasu, Ma si hangasinay mo da futaykooni.

²⁵Zama ni ma si a te-goyey dondon, Ka du ni fundo se hirrimi.

²⁶Ma si goro yadda sambuyaŋ nookoy ra, Wala mo borey kaŋ yaŋ ga garaw sambuyaŋ yadda sambu.

²⁷Da ni sinda banayaŋ hari, Ifo se no a ga ni daarijo kaa ni se ni cire?

²⁸Fari hirri seeda zeeno kaŋ ni kaayey sinji, Ma s'a ganandi.

²⁹Ni go ga di boro kaŋ gonda himma nga muraadey ra, wala? Bora din ga kay koyey jine, A si kay talkey jine bo.